सन्दीप लामिछाने मेलबर्न विरुद्ध अन्तिम एघारमा, होबर्ट ब्याटिंग गर्दै

गोरखापत्र अनलाइन
काठमाडौं, पुस १८ गते । सन्दीप लामिछानेले बिग बैश लिगको जारी संस्करणमा आफ्नो पहिलो म्याच खेल्न लाग्नुभएको छ । होबर्ट हुरिकेन्सबाट उहाँले मेलबर्न विरुद्धको अन्तिम एघारमा स्थान सुनिश्चित गर्नुभएको छ । खेल अबको केही समयमा सुरु हुँदैछ । सन्दीपले प्रतिनिधित्व गरेको होबर्टले टस हारेर पहिला ब्याटिंग गर्ने निम्ता पाएको छ ।
यसअघि होबर्ट हुरिकेन्सले मेलबर्न विरुद्धको खेलको लागि १७ सदस्यको सूची सार्वजनिक गर्दा सन्दीप पनि उक्त सूचीमा अटाएका थिए । टोलिमा सन्दीपसँगै अर्का अनुभवी स्पिनर एवम् अलराउण्डर जोहान बोथाले स्थान पाउनुभएको छ । जोहान बोथा दक्षिण अफ्रिकी अलराउन्डर हुनुहुन्छ ।
अघिल्लो खेलमा गब्बा क्रिकेट ग्राउन्डमा ब्रिसबेन हिटलाई एक रनको झिनो अन्तरले हराएको होबर्ट हुरिकेन्स छ खेलबाट १५ अङ्क बटुल्दै छैठौं स्थानमा छ । उसले यसअघिको दुई खेल हारेको छ ।
अन्तर्राष्ट्रिय स्पर्धाको तयारी स्वरुप बन्द प्रशिक्षणमा सहभागी भएको एक साता नबित्दै उहाँ बिग बैश लिग खेल्न अष्ट्रेलिया प्रस्थान गर्नुभयो । बन्द प्रशिक्षणकै क्रममा उहाँ कोभिड १९ बाट सङ्क्रमित भएपछि करीब एक साता आराम गर्नुभएको थियो । पुस सुरुमा अष्ट्रेलिया पुग्नुभएका सन्दीप १४ दिने क्वारेन्टिन बिताएपछि शनिबार मेलबर्न विरुद्धको खेल उत्रिन लाग्नुभएको हो ।