रियल मड्रिडका प्रशिक्षक जिदानमा कोरोना सङ्क्रमणको पुष्टि

गोरखापत्र अनलाइन
काठमाडौं, माघ १० गते । रियल मड्रिडका प्रशिक्षक जिनेदिन जिदान कोरोनाभाइरसबाट सङ्क्रमित हुनुभएको छ । स्पेनिस क्लब रियल मड्रिडले एक संक्षिप्त वक्तब्य जारी गर्दै जिदानमा कोरोनाभाइरसको सङ्क्रमणको पुष्टि गरेको हो । गत साताको सुरुवातमा मात्रै सङ्क्रमितको सम्पर्कमा आएपछि जिदान आइसोलेशनमा बस्नुभएको थियो ।
गत् बुधबार कोपा डेल रेमा तेस्रो डिभिजनको क्लब अल्कोयानोसँग हारेपछि प्रशिक्षक जिदान रियल मड्रिडको कमजोर प्रदर्शनलाई लिएर तनावमा हुनुहुन्छ । शनिबारका लागि निर्धारित स्पेनिस ला लिगाको खेलमा रियल मड्रिडले आल्भ्सको सामना गर्दैछ । शीर्ष स्थानको एटलेटिकोभन्दा सात अङ्क कम रहेप नि रियल दोस्रो स्थानमा छ ।
स्पेनिस ला लिगामा शनिबार आल्भ्सलाई आमन्त्रण गर्दा रियलले लिगमा आफ्नो अपराजित यात्रालाई आठौं खेलसम्म लग्न प्रयत्नशील रहनेछ ।