म्यान्चेष्टर यूनाइटेडको साउथम्पटनमाथि ९–० को जित

गोरखापत्र अनलाइन
काठमाडौं, माघ २१ गते । म्यान्चेष्टर यूनाइटेडले साउथम्पटनलाई ९–० को विशाल अन्तरले हराएको छ । प्रिमियर लिगमा कुनै टोली ९–० को फराकिलो अन्तरले हारेको यो तेस्रो पटक मात्रै हो । यसअघि म्यान्चेष्टर यूनाइटेडले नै सन् १९९५ मा इप्सीक टाउनलाई ९–० को फराकिलो अन्तरले हराएको थियो ।
ओल्ड ट्राफोर्डमा आरोन वान बिस्साकाले १८ औं मिनेटमा गोल गर्दै म्यान्चेष्टर यूनाइटेडलाई १–० को अग्रता दिलाउनुभयो । मार्कस राशफोर्डले २५ औं मिनेटमा यूनाइटेडका लागि गोल गर्दै अग्रतालाई दोब्बर पारेको नौ मिनेटपछि जान बेडनारेकले आफ्नो पोष्टमा बल छिराउँदा यूनाइटेडको अग्रता ३–० भयो । एडिन्सन काभानीले ३९ औं मिनेटमा गोल थप्दै पहिलो हाफमै यूनाइटेडको अग्रतालाई ४–० बनाउनुभयो ।
दोस्रो हाफमा केही लयमा देखिएको साउथम्पटनले यूनाइटेडलाई खेलको उत्तरार्धमा भने रोक्न सकेन । र यूनाइटेडले अन्तिम २१ मिनेटमा पाँच गोल थप्यो । पछिल्लो आठ खेलमा गोलविहीन बन्न पुगेका एन्थोनी मार्सलले ६९ औं र ९० औं मिनेटमा दुई गोल गर्नुभयो । म्याक टोमिनेले ७१ औं मिनेटमा यूनाइटेडका लागि छैठौं गोल गर्नुभयो । ८७ औं मिनेटमा ब्रुनो फर्नान्डिसले पाएको पेनाल्टीलाई गोलमा परिणत भयो । मार्सललाई लडाउन पुग्दा बेडनारेक मैदानबाट बाहिरिन पुगे । डान जेम्सले अतिरिक्त समयमा गोल गर्दा यूनाइटेडले साउथम्पटनमाथि ९–० को फराकिलो जित सुनिश्चित गयो ।