महिला लिगको दोस्रो चरणको खेल तालिका सार्वजनिक

गोरखापत्र अनलाइन
काठमाडौं, माघ २३ गते । अखिल नेपाल फुटबल संघ(एन्फा)ले राष्ट्रिय महिला फुटबल लिगको दोस्रो चरणको खेल तालिका सार्वजनिक गरेको छ । दोस्रो चरणका खेलहरु शनिबारबाट सुरु हुँदैछ ।
एन्फाका महासचिब इन्द्रमान तुलाधरका अनुसार दोस्रो चरणमा अन्तिम बाहेकका सबै खेलहरु एन्फा कम्प्लेक्स सातदोबाटोमा खेलाइनेछ । दोस्रो चरणको २१ औं तथा अन्तिम खेल त्रिपुरेश्वरस्थित दशरथ रङगशालामा खेलाइनेछ । दुई सातासम्म चल्ने दोस्रो चरणको खेलमा प्रत्येक टोलिले छ वटा म्याच खेल्नेछन् ।
कुल सात टोलि सहभागी राष्ट्रिय महिला लिग फुटबल २०७७ को पहिलो चरणको खेलपछि सशस्त्र प्रहरी बल(एपीएफ) शीर्ष स्थानमा रहेको छ । त्रिभुवन आर्मी फुटबल क्लब दोस्रो, बिराटनगर महानगरपालिका तेस्रो तथा नेपाल पुलिस क्लब चौथो स्थानमा छन् । स्याङ्जाको वालिङ नगरपालिका पाँचौं तथा रौतहटको चन्द्रपुर नगरपालिका छैठौं र उदयपुरको चौदण्डीगढी नगरपालिका पूछारमा छन् ।