एभर्टन एफ ए कपको क्वार्टरफाइनलमा पुग्यो

गोरखापत्र अनलाइन
काठमाडौं, माघ २९ गते । एभर्टनले टट्टनहम हर्ट्सपरलाई हराउँदै एफ ए कपको क्वार्टरफाइनलमा प्रवेश गरेको छ । गुडिसन पार्कमा गए राति सम्पन्न खेलमा एभर्टनले टट्टनहमको यात्रा टुंग्याउन ५–४ को जित हात पार्यो ।
निर्धारित समयसम्म ४–४ को बराबरीमा खेल टुंगिदा थपिएको अतिरिक्त समयको सातौं मिनेटमा बर्नाडले गोल गर्दै एभर्टनको टट्टनहममाथि ५–४ को जित सुनिश्चित गर्नुभयो ।
खेल सुरु भएको तेस्रो मिनेटमा कुनाबाट देविडसन साञ्चेजले हेडमार्फत् गर्नुभएको प्रहार गोलमा परिणत भएपछि स्पर्सले एभर्टनमाथि १–० को अग्रता लिन सफल भयो । तर पहिलो हाफको अन्तिम आठ मिनेटमा लगातार तीन गोल गरेर एभर्टनले ३–१ को अग्रता बनाउन सफल भयो । डोमिनिक काल्भर्ट लेविनले ३६ औं मिनेटमा गोल गर्दै एभर्टनलाई खेलमा बापसी गराउनुभयो । रिचर्लिसनले ३८ औं मिनेटमा गोल थप्नुभयो । गिल्फी सिगुरर्डस्सोनले ४३ औं मिनेटमा पेनाल्टीलाई गोलमा परिणत गर्नुभयो ।
पहिलो हाफकै इन्ज्युरी समयमा एरिक लमेलाले गोल गर्दै टट्नहमलाई २–३ को स्थितिमा पुर्याउनुभयो । साञ्चेजले ५७ औं मिनेटमा दोस्रो गोल गर्दा टट्टनहमले ३–३ को बराबरीमा ल्याउनुभयो । तर उसले लामो समयसम्म बराबरी जोगाउन सकेनन । ६८ औं मिनेटमा रिचर्डसनले दोस्रो गोल गर्दै टट्टनहममाथि ४–३ को अग्रता बनाउनुभयो ।
मौरिन्होले एक घण्टापछि हयारी केनलाई मैदानमा प्रवेश गराएको २० मिनेटपछि केनले गोल थप्दै टट्टनहमलाई ४–४ को बराबरीमा पुर्याउनुभयो । तर बर्नाडले ९७ औं मिनेटमा गोल थप्दा एभर्टनले एफ ए कपको क्वार्टरफाइनलमा प्रबेश सुनिश्चित गर्नुभयो ।