क्रिष्टियानो रोनाल्डोको गोलमा युभेन्ट्सको जित

गोरखापत्र अनलाइन
काठमाडौं, फाल्गुन ११ गते । क्रिष्टियानो रोनाल्डोले दुई गोल गरेपछि युभेन्ट्सले क्रोटोनमाथि ३–० को जित हात पारेको छ । क्रोटोनमाथि जितसँगै युभेन्ट्स इटाली सिरी ए को तेस्रो स्थानमा उक्लेको छ ।
पहिलो हाफको ३८ औं मिनेटमा लोबो सिल्भाको सहयोगमा क्रिष्टियानो रोनाल्डोले हेडरमार्फत गोल गर्नुभयो । पहिलो हाफकै थपिएको समयमा एलेक्स सान्ड्रोको क्रसलाई आरोन राम्सेले रोनाल्डोतर्फ मोडेपछि रोनाल्डोले हेडरमार्फत गोलको दिशा दिँदै पहिलो हाफमै युभेन्ट्सलाई २–० को अग्रता दिलाउनुभयो । ६६ औं मिनेटमा वेष्टन म्याकेनीले गोल पोष्ट नजिकबाट गर्नुभएको प्रहार गोलमा परिणत भएपछि युभेन्ट्सले अङ्कतालिकाको पुछारमा रहेको क्रोटोनमाथि ३–० को जित सुनिश्चित गर्यो ।
युभेन्ट्सले २२ खेलबाट ४५ अङ्क जोडेको छ । ऊ तेस्रो स्थानमा उक्लिदा शीर्षस्थानको इन्टर मिलानले २३ खेलबाट ५३ अङ्क बटुलेको छ । दोस्रो स्थानको एसी मिलानले त्यत्तिकै खेलबाट ४९ अङ्क जोडेको छ ।