पार्मामाथि इन्टर मिलानको जित

गोरखापत्र अनलाइन
काठमाडौं, फागुन २१ गते । इन्टर मिलानले पार्मामाथि २–१ को जित हात पारेको छ । इटाली सिरी ए अन्तगर्त गए राति सम्पन्न खेलमा इन्टर मिलानले पार्मालाई हराएको हो ।
इन्टरको जितमा अलेक्सिस साञ्चेजले दुई गोल गर्नुभयो । दुबै टोलिले रक्षात्मक खेल्दा पहिलो हाफ गोलरहित बराबरीमा सम्पन्न भयो । मिलानको दुबै गोलमा म्यान्चेष्टर यूनाइटेडका पूर्ब फरवार्ड रोमेलो लुकाकुले महत्वपूर्ण योगदान दिनुभयो । ५४ औं मिनेटमा साञ्चेजले रोमेलो लुकाकुको पासलाई गोलको दिशा दिनुभयो । आठ मिनेटपछि लुकाकुकै पासमा गोल अन्तरलाई दोब्बर बनाउँदै इन्टर मिलानलाई साञ्चेजले २–० को अग्रता दिलाउनुभयो ।
पार्माले भने ७१ औं मिनेटमा अजेबेडो जुनियरको गोलबाट खेलमा पुनरागमन गरेपनि उसले निरन्तरता दिन सकेन । पार्मा भने गत् नोभेम्बर यता कुनै जित हात पार्न सकेको छैन् । ऊ १९ औं स्थानमा रहेपनि रेलिगेशनबाट छ अङ्कमाथि रहेर सुरक्षित छ ।
जितसँगै इन्टर मिलानले २५ खेलबाट ५९ अङ्क बटुल्दै शीर्ष स्थानमा छ अङ्कको अग्रता कायम गरेको छ । दोस्रो स्थानको एसी मिलानको ५३ अङ्क छ । लिग विजेता युभेन्ट्सले भने २४ खेलबाट मात्र ४९ अङ्क जोडेको छ ।