एटलेटिकोलाई हराउँदै चेल्सी च्याम्पियन्स लिगको क्वार्टरफाइनलमा पुग्यो

गोरखापत्र अनलाइन
काठमाडौं, चैत्त ५ गते । चेल्सी च्याम्पियन्स लिगको क्वार्टरफाइनलमा पुगेको छ । पछिल्लो सात वर्षमा चेल्सी पहिलो पटक च्याम्पियन्स लिगको क्वार्टरफाइनलको यात्रा गरेको हो ।
च्याम्पियन्स लिग राउन्ड अफ १६ को दोस्रो लेगमा चेल्सीले एटलेटिको मड्रिडलाई २–० ले हराएको छ । ला लिगाको शीर्षस्थानमा रहेको एटलेटिकोले गत संस्करणमा लिभरपुललाई अन्तिम १६ बाट बाहिर पठाएको थियो ।
पहिलो लेगमा १–० को जित हात पारेको चेल्सीले दोस्रो लेगमा २–० को जित दर्ता गर्दै एटलेटिकोमाथि समग्रमा ३–० को जितसँगै क्वार्टरफाइनलमा पुगेको हो ।
दोस्रो हाफको अतिरिक्त समयमा एमरसन पल्मिएरीले गर्नुभएको गोल चेल्सीलाई २–० को जित दिलाउन पर्याप्त भयो । एमरसनले अतिरिक्त समयको चौथो मिनेटमा गोल गर्नुभयो । त्यसअघि हकिम जियेकले पहिलो हाफमा गर्नुभएको गोलले चेल्सीले १–० को अग्रता लिएको थियो । ३४ औं मिनेटमा उहाँले पहिलो गोल गर्नुभयो ।
थोमस टुचेल प्रशिक्षक भएर जिम्मेवारी सम्हाले यता चेल्सीले १३ खेलमध्ये ११ मा जित हात पारेको छ ।