म्यान्चेष्टर यूनाइटेड यूरोपा लिगको क्वार्टरफाइनलमा पुग्यो

गोरखापत्र अनलाइन
काठमाडौं, चैत्त ६ गते । म्यान्चेष्टर यूनाइटेड यूरोपा लिगको क्वार्टरफाइनलमा पुगेको छ । यूरोपा लिग अन्तर्गत राउन्ड अफ १६ को दोस्रो लेगमा एसी मिलानमाथि १–० को जित हात पार्दै समग्रमा उसले २–१ को अग्रताले क्वार्टरफाइनलको स्थान सुनिश्चित गरेको हो । पहिलो लेग १–१ को बराबरीमा सम्पन्न भएको थियो।
म्यान्चेष्टर यूनाइटेडको जितमा घाइते भएर खेलमा पुनरागमन गर्नुभएका पौल पोग्बाले निर्णायक भूमिका निर्वाह गर्नुभयो । हाफटाइमसम्म गोलरहित बराबरीमा सम्पन्न भएको खेलको दोस्रो हाफको सुरुवातमै पौल पोग्बाले गर्नुभएको गोल निर्णायक रहन गयो । दोस्रो हाफमा ‘सब्स्टिच्युट’को रुपमा आउनुभएका फ्रान्सेली पोग्बाले मैदान प्रबेश गरेको तेस्रो मिनेटमै गोल गर्नुभयो ।
तिघ्रामा आएको चोटको कारण करिब छ महिनासम्म आराम गर्नुभएका २८ वर्षीय पोग्बाले जारी संस्करणको पहिलो खेलमा उत्रिनुभयो ।