गोल्डेनगेट र अक्सब्रिज सेमिफाइनलमा

काठमाडौँ, पुस ५ गते । गोल्डेनगेट र आयोजक अक्सब्रिज इन्टरनेसनल कलेज ‘ए’ प्रथम अक्सब्रिज थ्री बाइ थ्री ब्वाइज बास्केटबल प्रतियोगिताको बेचलर्सतर्फ सोमबार सेमिफाइनलमा प्रवेश गरेका छन् ।

महालक्ष्मीस्थानस्थित आयोजकको कोर्टमा गोल्डेनगेटले जेभियर इन्टरनेसनल ‘बी’ लाई २१–१२ ले पराजित ग¥यो । गोल्डेनगेटको जितमा अभिषेक सिंहले नौ अंक जोड्नुभयो ।
प्रयुश श्रेष्ठको सात अंक सहयोगमा अक्सब्रिज ‘ए’ ले आफ्नै ‘बी’ टिमलाई १७–१५ ले हरायो ।

एक्सेल ग्लोबल सर्भिसेसको मुख्य प्रायोजनमा भइरहेको प्रतियोगिताको सोही विधामा सेन्ट जेभियर्स र जेभियर इन्टरनेसनल ‘ए’ पनि सेमिफाइनलमा पुगेका छन् । सेन्ट जेभियर्सले कसमसलाई २०–१७ ले हरायो । सेन्ट जेभियर्सका दिप्सन केसीले १२ स्कोर गर्नुभयो । जेभियर इन्टरनेसनल ‘ए’ ले लुम्बिनीलाई १८–१३ ले पाखा लगायो । विजेताका निकेश मगरले आठ अंक बनाउनुभयो ।

सेमिफाइनलमा सेन्ट जेभियर्सले जेभियर इन्टरनेसनल ‘ए’ र गोल्डेनगेटले अक्सब्रिज ‘ए’ विरुद्ध खेल्नेछ । प्लस टुतर्फ यसअघिनै सेमिफाइनल समिकरण पूरा भएको छ ।