सेन्ट्रल जोन भलिबल : पुरुषमा नेपाल पदक बिहीन
काठमाडौँ, पुस १३ गते । एभिसी एसियन सिनियर सेन्ट्रल जोन पुरुष तथा महिला भलिबल च्यालेन्ज कप अन्तर्गत पुरुषतर्फ नेपाल पदक विहिन बनेको छ । महिलामा स्वर्ण पदक जितेको नेपाल पुरुषतर्फ तेस्रो स्थानको लागि मंगलबार नै भएको खेलमा उज्वेकिस्तानसँग ३–० को सोझो सेटमा पराजित भयो ।
नेपाल उज्वेकिस्तानसँग २५–१५,२५–१७,२५–२२ ले स्तब्ध बनेको हो । लिग चरणको खेलमा भने नेपालले उज्वेकिस्तानलाई ३–१ को सेटमा हराएको थियो । लिग चरणमा बंगलादेशसँग ३–० र श्रीलंकासँग ३–१ को सेटमा पराजित भएको नेपालले माल्दिभ्सलाई अन्तिम खेलमा ३–० को सेटमा हराउँदै तेस्रो स्थानका लागि भिडन्त पक्का गरेको थियो ।
तर, कांस्य पदकको भिडन्तमा उज्वेकिस्तानले नेपालसँग लिग चरणमा खेपेको हारको बदला राम्रोसँग लियो । दुई वर्षअघि नेपालमै भएको प्रतियोगितामा पुरुषतर्फ नेपाल समूह चरणबाटै बाहिरिएको थियो ।
पाँच वर्षअघि माल्दिभ्समा भएको प्रतियोगितामा भने नेपालले कांस्य पदक जितेको थियो । पुरुष भलिबलको चार दशक लामो अन्तर्राष्ट्रिय यात्रामा नेपालले जितेको त्यो नै पहिलो पदक थियो ।