बङ्गबन्धु म्याराथनमा पुष्पालाई कांस्य

काठमाडौँ, पुस २६ गते । नेपालकी धाविका पुष्पा भण्डारीले बङ्गबन्धु शेख मुजिव ढाका म्याराथनमा कांस्य पदक जित्नुभएको छ । बङ्गलादेशको ढाकामा सोमबार भएको प्रतियोगितामा महिलातर्फ पुष्पाले निर्धारित दूरी दुई घण्टा ५७ मिनेट ३५ सेकेन्डमा पूरा गर्नुभयो ।

भारतीय खेलाडी हावी भएको प्रतियोगितामा यसपटक पुष्पा कांस्यमा सीमित बन्नुभएको हो । गत संस्करणमा पुष्पाले स्वर्ण जित्नुभएको थियो । महिलातर्फ भारतकी आरती पटेलले दुई घण्टा ५३ मिनेट २८ सेकेन्डको समय निकाल्दै स्वर्ण र भारतकै ज्योति गावटीले दुई घण्टा ५४ मिनेट १४ सेकेन्डको समय निकाल्दै रजत जित्नुभयो ।

पुरुषतर्फ नेपालका किरण बोगटी पाँचौँ हुनुभयो । १३औँ दक्षिण एसियाली खेलकुद (साग) का स्वर्ण विजेता बोगटीले निर्धारित दूरी दुई घण्टा २३ मिनेट ४३ सेकेन्डमा पूरा गर्नुभएको थियो । पुरुषतर्फ भारतका बुगाथा स्रिनुले स्वर्ण र भारतकै अर्जुन प्रधानले रजत जित्नुभयो ।