पदक विजेता सुमन सम्मानित
काठमाडौँ, पुस २८ गते । दुई फरक अन्तर्राष्ट्रिय अनलाइन कराँते प्रतियोगिताका पदक विजेता खेलाडी सुमन तिमल्सिनालाई नेपाल गोजुरियो कराँते डो सङ्घले बुधबार सम्मान गरेको छ ।
नेपाल गोजुरियो कराँते डो सङ्घ एवं एसियाली गोजुरियो कराते महासङ्घका महासचिव बीआर मित्र र सागा एड्भेन्चर टुर्स एन्ड ट्राभल्स प्रालिका निर्देशक स्वच्छम गुरुङले सुमनलाई खादा र प्रशंसा पत्रसहित सम्मान गर्नुभयो । सुमनले हालै टोरोन्टो इन्टरनेसनल इ काता च्याम्पियनसिपमा स्वर्ण जित्नुभएको थियो ।
सुमनले वर्ल्ड युनियन मार्सल आर्ट्स फेडरेसन (डब्लुयुएमएफ), लन्डनको आयोजनामा भएको वल्र्ड कप कराते इ काता च्याम्पियनसिपमा कांस्य, सन् २०११ मा बङ्गलादेशमा भएको तेस्रो एसियाली कन्टिनेन्टल कराते प्रतियोगितामा स्वर्ण र २०११ मै श्रीलङ्कामा भएको प्रथम अन्तर्राष्ट्रिय खुला कराँते प्रतियोगितामा स्वर्ण जित्नुभएको थियो ।
उहाँले २०१२ मा भारतमा भएको छैटौँ एसियाली गोजुरियो खुला कराँते प्रतियोगितामा रजत, २०१६ मा मलेसियामा भएको प्रथम एसियाली प्यासिफिक गोजुरियो कराते प्रतियोगितामा कांस्य तथा २०२१ मा जर्मनीमा भएको चेम्निज खुला अन्तर्राष्ट्रिय कराँते प्रतियोगितामा समान १–१ स्वर्ण र कांस्य जित्नुभएको थियो ।