मेड्भेडेभ क्वार्टरफाइनलमा

काठमाडौँ, माघ १० गते । दोस्रो वरियताका रुसी खेलाडी ड्यानियल मेड्भेडेभ अष्ट्रेलियन ओपन टेनिसको क्वार्टरफाइनलमा प्रवेश गर्नुभएको छ । मेलवर्नमा सोमबार भएको खेलमा मेड्भेडेभले अमेरिकाका म्याक्सि क्रेसीलाई ३–१ को सेटमा हराउनुभयो ।

मेड्भेडेभले ७०औँ वरियताका क्रेसीमाथि ६–२, ७–६ (७–४), ६–७ (४–७), ७–५ को जित निकाल्नुभयो । क्वार्टरफाइनलमा मेड्भेडेभले नवौँ वरियताका फ्लेक्स अगर एलिएसिमसँग प्रतिस्पर्धा गर्नुहुनेछ । सोमबारनै भएको खेलमा क्यानाडाका एलिएसिमले क्रोएसियाका मारिन चिलिचलाई ६–२ ७–६ (९–७), ६–७ (४–७), ७–५ ले पन्छाउनुभएको थियो ।

यसैगरी महिलातर्फ फ्रान्सकी एलिज कोर्नेट क्वार्टरफाइनलमा पुग्नुभएको छ । सोमबार ६१औँ वरियताकी एलिजले रोमानियाकी १५औँ स्थानकी सिमोना हालेपलाई ६–४, ३–६, ६–४ ले हराउनुभयो । एजेन्सी