नाडाल सेमिफाइनलमा

काठमाडौँ, माघ ११ गते । स्पेनिस स्टार राफेल नाडाल अष्ट्रेलियन ओपन टेनिसको सेमिफाइनलमा प्रवेश गर्नुभएको छ । मेलबर्नमा मंगलबार भएको क्वार्टरफाइनल भिडन्तमा पाँचौँ वरियतामा नाडालले १४औँ वरीयताका क्यानडाका डेनिस सापालोभलाई ३–२ को सेटमा हराउनुभयो ।

नाडालले ६–३, ६–४, ४–६, ३–६, ६–३ को प्रतिस्पर्धात्मक जित निकाल्नुभएको थियो । सन् २००९ मा एक पटक उपाधि जितेका नाडालले सातौँ पटक सेमिफाइनलमा स्थान बनाउनुभएको हो । यसैगरी महिलातर्फ अष्ट्रेलियाकी विश्व नम्बर एक अस्लेइग बार्टी सेमिफाइनलमा पुग्नुभएको छ ।

मंगलबार बार्टीले अमेरिकी खेलाडी जेसिका पेगुलालाई ६–२, ६–० को सोझो सेटमा हराउनुभयो । सेमिफाइनलमा बार्टीले अमेरिकाकै म्याडीसन कियससँग प्रतिस्पर्धा गर्नुहुनेछ । म्यानडिसनले चेक रिपब्लिककी बारबोरा क्रेचकिकोभालाई ६–२, ६–२ को सोझो सेटमा हराउनुभयो । एजेन्सी