एनएनआईपीएले २७ खेलका खेलाडीलाई सम्मान गर्ने
काठमाडौँ, माघ २७ गते । १६औँ संस्करणको एनएनआईपीए स्पोर्ट्स अवार्ड–२०७८ फागुन १७ गते गोदावरी नगरपालिकामा हुने भएको छ । अवार्डमा २७ खेलका खेलाडीलाई सम्मान गरिने बिहीबार आयोजित पत्रकार सम्मेलनमा नेपाल राष्ट्रिय तथा अन्तर्राष्ट्रिय खेलाडी संघ (एनएनआईपीए) का अध्यक्ष दीपक श्रेष्ठले जानकारी दिनुभयो ।
अवार्डमा यसपटक ओलम्पिक कमिटिमा आवद्ध २७ खेलका उत्कृष्ट खेलाडीलाई बर्ष खेलाडी अवार्डमाट सम्मानित गरिन लागिएको जानकारी पनि श्रेष्ठले बताउनुभयो । यसपटक बज्रबाराही मन्दिर परिसरमा हुने अवार्डको सम्पूर्ण ब्यवस्थापन गोदावरी नगरपालिकाले गर्ने नगरपालिकाका मेयर गजेन्द्र महर्जनले जानकारी दिनुभयो ।
२७ खेलका उत्कृष्ट खेलाडीलाई अवार्डसहित जनही १० हजार रुपियाँ, पुरुष र महिला एक एक जना खेलाडीलाई सर्वोत्कृष्ट खेलाडी अवार्डबाट एक लाख रुपियाँ सहित सम्मान गरिने पनि बताईएको छ ।
संघले एक पुरुष र एक महिलालाई प्रतिभाशाली खेलाडी तथा एक पुरुष र एक महिलालाई उदयमान खेलाडी सम्मान स्वरुप जनही ५० हजार रुपियाँ, एक जना पाका खेलकर्मीलाई ३५ हजार रुपियाँ सहित गजराज आदर्श खेल व्यक्तित्व अवार्ड प्रदान गर्ने जनाएको छ ।
यसैगरी एक जना पारा खेलाडीलाई १० हजार रुपियाँ सहित बर्ष उत्कृष्ट पारा खेलाडी तथा एक जना खेल पत्रकारलाई २५ हजार रुपियाँ सहित एनएनआईपीए पत्रकारिता पुरस्कार प्रदान गरिने बताईएको छ । संघका मानार्थ अध्यक्ष दीपक विष्टले संघले विभिन्न शहरका अवार्ड कार्यक्रम सञ्चाल गर्दै जाने योजना अनुसार यसपटक गोदावरीमा गरिन लागिएको बताउनुभयो ।