भारतमा ३८ हजार सङ्क्रमित थपिए

भारतमा गएको चौबीस घण्टामा ३८ हजार ६६७ सङ्क्रमितको पुष्टि भएको छ । गएको चौबीस घण्टामा २२ लाख २९ हजार ७९८ नमुना परीक्षण गरिएको छ । थपिएका सङ्क्रमितसँगै भारतमा कोरोनाका कुल सङ्क्रमितको संख्या तीन करोड २१ लाख ५६ हजार ४९३ पुगेको छ ।

चीनका ७७ करोड ७० लाखलाई खोपको पूरा मात्रा

चीनमा बिहीबारसम्म ७७ करोड ७० लाख व्यक्तिलाई कोरोना भाइरसविरुद्धको खोपको पुर्ण मात्रा लगाइएको छ । एउटा मात्रै खोप लगाएकाहरुको सङ्ख्या अझै धेरै भए पनि दुवै खोप लगाएर खोपको मात्रा पूरा गरेकाहरुको सङ्ख्या ७७ करोड ७० लाख पुगेको स्वास्थ्य अधिकारीहरुले शुक्रबार जानकारी दिएका छन् ।

अफगानिस्तानको एक करोड ८४ लाख जनसङ्ख्यालाई मानवीय सहयोग आवश्यक

अफगानिस्तानका राहत कर्मीहरुले झण्डै चार करोड जनसङ्ख्यामध्ये एक करोड ८४ लाख जनसङ्ख्यालाई मानवीय सहयोगको आवश्यकता पर्नसक्ने संयुक्त राष्ट्रसंघले बताएको छ । देशभरि लडाइँ फैलिँदै जाँदा एक करोड ८४ लाख मानिसलाई मानवीय आवश्यकता पर्नसक्ने मूल्याङ्कन गरिएको राष्ट्रसंघका मानवीय सहयोगमामिला अधिकारीले बिहीबार बताएका हुन् ।

युद्ध नायकलाई तालिबानले नियन्त्रणमा लियो

मुजाहिद्दीनका पूर्ब नेता एवम् जमात ए इस्लामी दलका वरिष्ठ सदस्य इस्माइली खानलाई तालिबानले नियन्त्रणमा लिएको छ । उहाँसहित केही सरकारी अधिकारीलाई तालिबानले शुक्रबार कब्जामा लिएको स्थानीय सञ्चारमाध्यमलाई उद्धृत गर्दै एएनआईले उल्लेख गरेको छ । सन् २००१ मा तालिबान बिरुद्ध लड्न अमेरिकालाई सघाएर उल्लेख्य योगदान गरेपछि उहाँलाई अफगानिस्तानमा युद्ध नायकको संज्ञा दिइएको छ ।

चीनको किनघाई प्रान्तमा भूकम्प

चीनको किनघाई प्रान्तमा ५.८ रिक्टेर स्केलको भूकम्प गएको छ । उत्तर पश्चिम गोलोग तिब्बती स्वशासित क्षेत्रको मदुओ काउन्टीमा भूकम्प गएको सिन्हवाले उल्लेख गरेको छ । चिनियाँ भूकम्प सञ्जाल केन्द्र(सीइएनसी)का अनुसार जमीनको सतहभन्दा आठ किलोमिटर भूकम्पको केन्द्र मापन गरिएको छ । भूकम्पबाट भएको क्षतिको बिवरण भने अझै आइसकेको छैन् ।