काठमाडौं, माघ १३ गते । मुलुकको विभिन्न स्थानमा भएको छुट्टाछुट्टै दुर्घटनामा परी दश जनाको मृत्यु भएको छ । प्रहरी प्रधान कार्यालयले रौतहट, इलाम, पाँचथर, पाल्पा, पर्सा, कञ्चनपुर, झापा र धादिङका विभिन्न स्थानमा भएका छुट्टाछुट्टै सवारी दुर्घटनामा परी दश जनाको मृत्यु भएको जनाएको छ ।
रौतहटको गरुडा नगरपालिका–४ गरुडा गाउँस्थित सडकमा ना.६२ प ३३९९ नम्बरको माेटरसाइकल अनियन्त्रित भई बुधबार राति दुर्घटना हुँदा मोटरसाइकलमा सवार सोही ठाउँ बस्ने १९ वर्षीय महमद अलताफ आलम र २५ वर्षीय रवि साहको मृत्यु भएको छ । दुर्घटनामा गम्भीर घाइते भएका उनीहरुको उपचारका लागि झाझपुलस्थित ग्राण्डी अस्पतालतर्फ लैजाने क्रममा बाटोमै मृत्यु भएको हो ।
इलामको रोङ गाउँपालिका–४ पहिरोस्थित सडकमा प्रदेश १–०१–००१ च ७९१६ नम्बरको पिकअप गाडी अनियन्त्रित भई बिहीबार बिहान दुर्घटना हुँदा गाडीमा सवार झापा मेचीनगर नगरपालिका–४ बस्ने ५५ वर्षीय रमेश थापा र ४० वर्षीय सूर्यबहादुर थापाको घटनास्थलमै मृत्यु भएको छ । दुर्घटनामा गम्भीर घाइते भएका गाडीका चालकलाई उपचारका लागि बिएण्डसी अस्पताल झापातर्फ पठाइएको छ ।
त्यस्तै, पाँचथरको मिक्लाजुङ गाउँपालिका–१ फुङसिङस्थित सडकमा प्रदेश १–०१–००१ त ८५९५ नम्बरको ट्याक्टर बुधबार दिउँसो दुर्घटना हुँदा ट्याक्टर चालक इलाम माङसेबुङ गाउँपालिका–३ बस्ने २१ वर्षीय रविन लिम्बूको घटनास्थलमै मृत्यु भएको छ ।
पाल्पाको तानसेन नगरपालिका–६ वर्तुङचोकस्थित सडकमा लु.३त ४६१५ नम्बरको ट्याङ्करमा लु.४४ प १६१९ नम्बरको स्कुटर ठोक्किएर बुधबार दिउँसो दुर्घटना हुँदा स्कुटरमा सवार माथागढी गाउँपालिका–३ सराय बस्ने ५५ वर्षीया कान्तीसरा गाहाको मृत्यु भएको छ । दुर्घटनामा गम्भीर घाइते भएकी उनको लुम्बिनी मेडिकल कलेज प्रभाष पाल्पामा उपचारको क्रममा मृत्यु भएको हो । ट्याङ्कर चालकलाई प्रहरीले नियन्त्रणमा लिएको छ ।
यसैगरी, पर्साको सखुवाप्रसौनी गाउँपालिका–२ लक्ष्मीपुरस्थित सडकमा प्रदेश २–०३–००१ ख २१६३ नम्बरको टिपरको ठक्करबाट साइकलयात्री पर्सागढी नगरपालिका–१ घटनीटोल बस्ने ४५ वर्षीय तुरन चौधरीको बुधबार दिउँसो घटनास्थलमै मृत्यु भएको छ । हाल फरार टिपर चालकको प्रहरीले खोजी गरिरहेको छ ।
कञ्चनपुरको पुनर्वास नगरपालिका–३ माईली बजारस्थित सडकमा लु.२ स ००८१ नम्बरको अटोरिक्सा र से.१ प ७६४४ नम्बरको मटरसाइकल एक–आपसमा ठोक्किएर बुधबार दिउँसो दुर्घटना हुँदा अटो चालक सोही ठाउँ बस्ने ३५ वर्षीय राजेन्द्र मिजारको मृत्यु भएको छ । दुर्घटनामा गम्भीर घाइते भएका उनको सेती प्रादेशिक अस्पतालमा उपचारको क्रममा मृत्यु भएको हो । साथै दुर्घटनामा घाइते भएका अटोमा सवार र मोटरसाइकल चालक समेत गरी ६ जनाको सोही अस्पतालमा उपचार भइरहेको छ ।
झापास्थित मेचीनगर नगरपालिका–७ स्थित सडकमा मे.१ झ १७२ नम्बरको गाडीले मे.९ प ७९२७ नम्बरको मोटरसाइकललाई बुधबार साँझ ठक्कर दिँदा मोटरसाइकल चालक सोही ठाउँ बस्ने ३५ वर्षीय सन्तोष राजवंशीको मृत्यु भएको छ । ठक्करबाट गम्भीर घाइते भएका उनको बिएण्डसी अस्पताल बिर्तामोडमा उपचारको क्रममा मृत्यु भएको हो । गाडी चालकलाई प्रहरीले नियन्त्रणमा लिएको छ ।
यसैगरी, धादिङको धुनिबेसी नगरपालिका–६ चालिसेस्थित सडकमा ग.१ ख ४३३८ नम्बरको हाइसको ठक्करबाट पैदलयात्री उदयपुर बेलका नगरपालिका बस्ने ४२ वर्षीय दुर्गा घिमिरेको बुधबार साँझ मृत्यु भएको छ । ठक्करबाट गम्भीर घाइते भएका उनको शिक्षण अस्पताल काठमाडौंमा उपचारको क्रममा मृत्यु भएको हो । हाइस चालकलाई प्रहरीले नियन्त्रणमा लिएको प्रहरी प्रधान कार्यालयले जनाएको छ । साथै दुर्घटनाका सम्बन्धमा प्रहरीले थप अनुसन्धान गरिरहेको जनाएको छ ।
