टेकु अस्पतालमा खोप अभियान आजदेखि पुनः हुँदै

शुक्रराज ट्रपिकल तथा सरुवा रोग अस्पताल टेकुमा एक हप्ताका लागि स्थगन गरिएको कोरोना भाइरसविरुद्धको खोप अभियान आजदेखि पुनः सञ्चालन हुने भएको छ । अस्पतालका निर्देशक डा मनिषा रावलले काठमाडौँ महानगरपालिका स्वास्थ्य शाखा र नेपाल रेडक्रस सोसाइटीबाट जनशक्ति व्यवस्थापन हुने भएपछि खोप अभियान पुनः सञ्चालन गर्ने बताउनुभयो ।

मधेस प्रदेशमा राष्ट्रियसभा निर्वाचनको तयारी पूरा

मधेस प्रदेशको राजधानी जनकपुरधाममा आउँदो बुधबार हुने राष्ट्रियसभा निर्वाचनका लागि सम्पूर्ण तयारी पूरा भएको छ । मधेस प्रदेश निर्वाचन कार्यालय जनकपुरधामका सूचना अधिकारी कृष्ण राउतले मतदानका लागि आवश्यक मतपत्रहरु छापेर आइसकेको र मतदानमा खटिने कर्मचारीलाई तालिम दिएर परिचालन गरिसकेको जानकारी दिनुभयो ।

कर्मचारी संक्रमित भएपछि जिल्ला प्रशासन कार्यालय बन्द

जिल्ला प्रशासन कार्यालय बाँकेका अधिकांश कर्मचारीलाई कोभिड संक्रमण पुष्टि भएपछि सो कार्यालयलाई अनिश्चितकालका लागि बन्द गरिएको छ । बाँकेका प्रमुख जिल्ला अधिकारी सुर्यबहादुर खत्रीले सोमवार अपरान्ह एक सूचना जारी गरेर अर्को सूचना जारी नभएसम्मका लागि जिल्ला प्रशासन कार्यालयलाई बन्द गरिएको जनाउनुभएको छ ।

कोरोना संक्रमित परिवारलाई आर्थिक सहयोग प्रदान

कोरोना भाइरस (कोभिड १९) संक्रमणका कारण मृत्यु भएका व्यक्तिको परिवारले स्वास्थ्य कार्यालय लमजुङबाट आर्थिक सहायता पाएका छन् । कोरोनाबाट मृत्यु भएका ३८ जनाको परिवारले कार्यालयबाट ५० हजार रुपियाँका दरले १९ लाख रुपियाँ आर्थिक सहायता प्राप्त गरेको कार्यालयले जनाएको छ ।

निर्वाचनको सम्पूर्ण तयारी पूरा

राष्ट्रियसभा सदस्य पदको निर्वाचनका लागि प्रदेश नं १ मा सबै तयारी भइसकेको छ । प्रदेश निर्वाचन कार्यालय विराटनगरले यही माघ १२ गते हुने राष्ट्रियसभा सदस्यको निर्वाचनका लागि प्रदेशमा तीन सिटको निर्वाचनका लागि सो तयारी गरेको हो ।