राजमार्ग मर्मत गर्न माग गर्दै चक्काजाम

सर्लाहीको नवलपुर चोकका स्थानीयले भत्किएको पूर्व–पश्चिम राजमार्ग मर्मत गर्न माग गर्दै सोमबार दिउँसो केहीबेर राजमार्गमा चक्काजाम गरेका छन् ।

सेवा लिन खोप कार्ड अनिवार्य गरेसँगै खोप लगाउने बढे

स्याङ्जा जिल्लास्थित सेवा प्रदायक निकायमा आउने सेवाग्राहीलाई खोप कार्ड अनिवार्य गरेसँगै जिल्लामा खोप लगाउनेहरुको संख्या बढेको छ । जिल्लाका सबै स्वास्थ्य संस्थाहरुमा दुई दिन खोप अभियान सञ्चालन गरिएकामा अहिले तीनवटा स्वास्थ्य संस्थामा नियमित खोप अभियान जारी राखिएको स्वास्थ्य कार्यालयकी प्रमुख बसुन्धरा शर्माले जानकारी दिनुभयो ।

बाँकेमा परीक्षण गरिएका ७० प्रतिशतमा संक्रमण

सात सयभन्दा बढी सक्रिय संक्रमित भएपछि रेड जोन घोषित भएको बाँकेमा परीक्षण भएकामध्ये ७० प्रतिशतभन्दा बढीमा कोरोना भाइरस संक्रमण पुष्टि भएको छ । जिल्लाका तीन वटा प्रयोगशालामा सोमवार १९५ नमुना परीक्षण गरिएकोमा १३७ जनामा भाइरस संक्रमण पुष्टि भएको जिल्ला कोभिड व्यवस्थापन केन्द्रले जनाएको छ ।

कपिलवस्तुमा सडकमै पाल टाँगेर कोरोना परीक्षण

कपिलवस्तुमा कोरोनाको तेस्रो लहर फैलिएपछि सडकमै पाल टाँगेर कोरोना परीक्षण गर्न सुरु गरिएको छ । स्वास्थ्य कार्यालय कपिलवस्तुले सोमवारदेखि जिल्ला सदरमुकाम तौलिहवाबाट निःशुल्क एन्टिजिन विधिबाट परीक्षण सुरु गरेको हो ।

कर्मचारीलाई सङ्क्रमण देखिएपछि जिल्ला प्रशासन गुल्मीको सेवा बन्द

जिल्ला प्रशासन कार्यालय गुल्मीमा कार्यरत कर्मचारीहरुलाई सङ्क्रमण पुष्टि भएपछि अत्यावश्यक सेवा बाहेक अन्य सेवा बन्द गरिएको छ । कार्यालयमा कार्यरत तीन जना कर्मचारीहरुलाई सङ्क्रमण पुष्टि भएको र अन्यलाई समेत केही लक्षणहरु देखा परेपछि परेकाले माघ ११ गतेदेखि अर्को सूचना जारी नभएसम्मका लागि अत्यावश्यक सेवाबाहेक अन्य सेवाहरु बन्द गर्ने निर्णय गरिएको प्रमुख जिल्ला अधिकारी पुन्यविक्रम पौडेलले जानकारी दिनुभयो ।