राष्ट्रलाई भ्रष्टचार मुक्त गरेर जनतालाई न्याय दिनुपर्छ : रामचन्द्र पौडेल

नेपाली काँग्रेसका वरिष्ठ नेता रामचन्द्र पौडेलले पार्टीको १४ औँ महाधिवेशनबाट पार्र्टी नयाँ युगमा प्रवेश गर्ने बताउनुभएको छ । ‘नेपाल राष्ट्र र नेपाली कांग्रेसलाई रुपान्तरण गर्न १४ औँ महाधिवेशन महत्वपूर्ण बन्छ’, वरिष्ठ नेता पौडेलले भन्नुभयो, ‘महाधिवेशनले पार्टीलाई नयाँ युगमा प्रस्थान गर्नेछ ।’

संविधानको सफल कार्यान्वयन काँग्रेसले मात्र गर्नसक्छ : बिमलेन्द्र निधि

नेपाली काँग्रेसका उपसभापति बिमलेन्द्र निधिले संविधानको सफल कार्यान्वय नेपाली काँग्रेसले मात्र गर्न सक्ने बताउनुभएको छ । शुक्रबार नेपाली काँग्रेसको १४ औँ महाधिवेशन उद्घाटन समारोहलाई सम्बोधन गर्दै निधिले यस्तो दाबी गर्नुभएको हो । ‘संविधानका कमिकमजोरीलाई सच्याउँदै संविधानको सफल कार्यान्वयन नेपाली काँग्रेसले मात्र गर्न सक्छ’, निधिले भन्नुभयो ।

युवाको साथमा छु : कृष्ण सिटौला

नेपाली काँग्रेसका पूर्वमहामन्त्री कृष्ण सिटौलाले आफू युवाको साथमा रहेको बताउनुभएको छ । पार्टीको १४ औँ राष्ट्रिय महाधिवेशन उद्घाटन समारोहमा आफ्नो मन्तव्य राख्नुहुँदै पूर्वमहामन्त्री सिटौलाले पछिल्लो पटक आफ्नो ध्यान युवाहरुमा केन्द्रित रहेको बताउनुभएको हो ।

काँग्रेस लोकतान्त्रिक आन्दोलनको बाहक हो : सहमहामन्त्री डा. महत

नेपाली काँग्रेसका सहमहामन्त्री डा. प्रकाशशरण महतले काँग्रेस लोकतान्त्रिक आन्दोलनको बाहक भएको बताउनुभएको छ । पार्टीको १४औँ महाधिवेशनको उद्घाटन समारोहमा सम्बोधन गर्दै डा. महतले लोकतान्त्रिक मूल्य र मान्यतालाई स्थापित गर्नका लागि काँग्रेसले अग्रसरता लिनुपर्ने बताउनुभएको हो । “लोकतान्त्रिक मूल्य मान्यतालाई कांग्रेसले जीवनपद्धतीका रुपमा अगाडि बढाउनुपर्छ”, उहाँले भन्नुभयो ।

मुलुकको अग्रणी लोकतान्त्रिक शक्ति काँग्रेस मात्रै हो : थापा

नेपाली काँग्रेसका सहमहामन्त्री सुनीलबहादुर थपाले मुलुकको अग्रणी लोकतान्त्रिक शक्ति काँग्रेस मात्रै भएको बताउनुभएको छ । शुक्रबार काँग्रेसको १४ औँ महाधिवेशन उद्घाटन समारोहलाई सम्बोधन गर्दै सहमहामन्त्री थापाले यस्तो बताउनुभएको हो । उहाँले काँग्रेसबाट मात्र संविधानको रक्षा र परिवर्तन हुने दाबी गर्नुभएको छ ।