सभामुख सापकोटा बिहीबार स्वदेश फर्कंदै

अन्तर व्यवस्थापिका संघ (आईपीयू) को १४३ औँ सम्मेलनमा सहभागीताका लागि स्पेनमा रहेको सभामुख अग्निप्रसाद सापकोटा बिहीबार स्वदेश फिर्ता हुने कार्यक्रम रहेको छ । सभामुख सापकोटा नेतृत्वको संसदीय प्रतिनिधि मण्डल बिहीबार स्वदेश फर्किन लागेको हो ।

विश्व बैंकको लगानी रहेका परियोजनाबारे श्रममन्त्रीसँग छलफल

श्रम, रोजगार तथा सामाजिक सुरक्षामन्त्री कृष्णकुमार श्रेष्ठसँग विश्व बैंकका राष्ट्रिय निर्देशक फारिस हदाद जर्भोससहितको प्रतिनिधिमण्डलले शिष्टाचार भेट गर्नुभएको छ। मन्त्रालयमा बुधबार भएको भेटमा उहाँहरूबीच विश्व बैंकको लगानीमा रहेका परियोजनाको प्रभावकारीताको विषयमा छलफल भएको हो ।

आफू बसेकै ठाउँबाट मतदाता नामावली दर्ता गर्न सकिने

निर्वाचन आयोगले मङ्सिर १७ गतेदेखि आफू बसेको ठाउँबाट मतदाता नामावली दर्ता गर्न सकिने व्यवस्था गरेको छ । बुधबार निर्वाचन पर्यवेक्षण समिति नेपालले आयोजना गरेको निर्वाचनसँग सम्बन्धित समसामायिक विषयमा गरिएको अन्तरक्रियामा निर्वाचन आयोगका प्रमुख आयुक्त दिनेशकुमार थपलियाले अब आफू बसेको ठाउँबाट नै मतदाता नामावली दर्ता गर्न सकिने व्यवस्था गरेको बताउनुभएको हो ।

राप्रपा परिवर्तन विरोधी होइन : कमल थापा

राष्ट्रिय प्रजातन्त्र पार्टी (राप्रपा) अध्यक्ष कमल थापाले आफूहरु परिवर्तन विरोधी नभएको दाबी गर्नुभएको छ । बुधबार पार्टीको एकता महाधिवेशनको उद्घाटन समारोहलाई सम्बोधन गर्दै अध्यक्ष थापाले यस्तो दाबी गर्नुभएको हो । थापाले राप्रपा परिवर्तन विरोधी नभएर मौलिक लोकतन्त्रको खोजीमा लागेको उल्लेख गर्नुभयो । राप्रपा पुरानो व्यवस्थातर्फ फर्किन नखोजेकोसमेत उहाँले प्रष्ट पार्नुभएको छ ।

परिवर्तनको गति रोक्ने काम नगरौँ : माधवकुमार नेपाल

नेकपा (एकीकृत समाजवादी) पार्टीका अध्यक्ष माधवकुमार नेपालले परिवर्तनको गतिलाई रोक्ने काममा नलाग्न सबैलाई आग्रह गर्नुभएको छ । बुधबार राष्ट्रिय प्रजातन्त्र पार्टी (राप्रपा) एकता अधिवेशनलाई सम्बोधन गर्दै अध्यक्ष नेपालले यस्तो बताउनुभएको हो । राष्ट्रियता नेपाली जनताको भावना हो । परिवर्तनको गतिलाई रोक्ने काममा हामी नलागौँ, अध्यक्ष नेपालले भन्नुभयो, 'अगाडि बढिसकेको इतिहास पछाडि फर्किंदैन ।'