रुसले आक्रमण गरेपछि युक्रेनबाट २० हजारभन्दा बढी नागरिक टर्की पुगे

युक्रेनमा रुसले सैन्य हमला गरेपछि यहाँका नागरिकहरु भागेर विदेशिएका छन् । त्यस क्रममा २० हजार जनाभन्दा बढी युक्रेनी नागरिक भागेर टर्की पुगेका बताइएको छ । टर्कीका अधिकारीहरुले दिएको जानकारीअनुसार आइतबार सम्ममा युक्रेनबाट भागेर २० हजार ५५० जना नागरिक टर्की पुगेका छन् ।

युक्रेनका विभिन्न शहरमा युद्धविराम, जनताकाे चाहना अनुसार जुनसुकै मुलुकमा जान पाउने

रुसले मगंलबार विहानदेखि गैरसैनिकहरुलाई युक्रेन छाड्नका लागि युद्धविराम हुने जनाएको छ । युक्रेन छोड्न चाहने युक्रेनी शरणार्थीहरुलाई आफूलाई पायक पर्ने देशमा जान सक्ने कुरालाई पनि रुसले जोड दिएको अलजजिराले उल्लेख गरेको छ ।

पोल्याण्डमा दश लाखभन्दा बढी युक्रेनी शरणार्थी पुगे

रुस–युक्रेन द्वन्द्वको कारण छिमेकी देश पोल्याण्डमा दश लाखभन्दा बढी शरणार्थीले आश्रय लिनपुगेका छन् । आइतबार मात्र एकलाख ४२ हजार शरणार्थीहले पोल्याण्ड प्रवेश गरेको पोलिस सीमा गार्डले बताएका छन् । आज सोमबार बिहान ७ बजे पोलिस युक्रेनी सीमामा ४२ हजार शरणार्थीहरु पुगेको कुरा गार्डले ट्वीटरमा जानकारी दिएको अलजजिराले जनाएको छ ।

भारतमा कोरोनाबाट थप चार हजार ३६२ सङ्क्रमित

भारतमा कोरोनाभाइरसबाट दैनिक सङ्क्रमितको सङ्ख्या दिन प्रति दिन घट्दै गइरहेको छ । भारतमा पछिल्लो २४ घण्टामा थप चार हजार ३६२ सङ्क्रमित भएका केन्द्रीय स्वास्थ्य मन्त्रालयले सोमबार जानकारी दिएको छ । योसँगै भारतमा अहिले सङ्क्रमित अवस्थामै रहेकाको सङ्ख्या भने ५४ हजार ११८ पुगेको अधिकारीहरुले जनाएका छन् । सक्रिय सङ्क्रमितको यो सङ्ख्या कूल सङ्क्रमितको ०.१३ प्रतिशत रहेको समाचारमा जनाइएको छ ।

सिरियामा विद्युतीय धरापमा पारेर १३ सैनिकको हत्या

सिरियामा विद्युतीय धरापमा पारेर यहाँका कम्तीमा पनि १३ जना सैनिकको हत्या गरिएको बताइएको छ ।सिरियाली सैनिक सबार बस यहाँको मध्य प्रान्तीय प्रदेश होम्स सहरमा विद्युतीय धरापमा पारिएको थियो ।