कपास उत्पादन र बजार विस्तार गर्ने सहमति

बाँकेको खजुरास्थित कपास विकास समिति र उद्योगी व्यवसायीबीच स्वदेशी कपास प्रयोग गर्नेबारे सहमति भएको छ । सोमबार नेपालगञ्जमा आयोजना गरिएको ‘कपास खेती तथा उद्योगका साझा चुनौती एवं सम्भावना’ विषयक अन्तक्र्रियामा कपास विकास समिति खजुरा र नेपाल कपास उद्योग तथा सिरक डसना व्यवसायी महासङ्घबीच सो सहमति बनेको हो ।

नेप्सेमा उच्च अङ्कको गिरावट, दुई कम्पनीको शेयरमा सर्किट

धितोपत्र बजारमा शेयर कारोबार मापक नेप्से परिसूचक आज उच्च अङ्कले ओरालो लागेको छ । नेपाल स्टक एक्सचेञ्जका अनुसार नेप्से परिसूचक ६९.७७ अङ्कले ओरालो लागेर दुई हजार ५२१.६५ मा ओर्लेको छ । ठूला कम्पनीको शेयर कारोबार मापन गर्ने सेन्सेटिभ परिसूचक १०.८५ अङ्कले ओरालो लागी ४७१.८९ मा ओर्लेको छ । कूल २३८ कम्पनीको एक करोड दुई लाख ९२ हजार २२६ कित्ता शेयर रु पाँच अर्ब ६० करोड ७४ लाख ३९ हजार ६७१ मूल्यमा खरिद बिक्री भए ।

सुनको मूल्यमा सामान्य वृद्धि

सुनचाँदी बजारमा आज छापावाल सुनको मूल्य प्रतितोला एक सय रुपियाँले बढेर ९३ हजार दुई सय रुपियाँ पुगेको छ । अघिल्लो दिन पहेँलो धातु प्रतितोला ९३ हजार एक सय रुपियाँमा कारोबार भएको थियो ।

ढल्केबर सौर्य आयोजना सञ्चालनमा

धनुषाको मिथिला नगरपालिका १ स्थित ढल्केबर सौर्य विद्युत आयोजनाको एक मेगावाट विद्युत राष्ट्रिय प्रसारण प्रणालीमा जोडिएको छ । अपि पावर कम्पनीले निर्माण गरेको सौर्य विद्युत आयोजनाको विद्युत आइतबारदेखि राष्ट्रिय प्रसारण प्रणालीमा जोडिएको हो ।

हुम्लामा पहिलो पटक फल्यो स्कुस तरकारी

हिमाली जिल्ला हुम्लामा पहिलो पटक स्कुस फलेको छ । नमुना परीक्षणका लागि लगाएको स्कुस सफल रुपमा फलेको हो ।सर्केगार्ड गाउँपालिका–७ को रोडिकोट गाउँकी किसानी धाँची शाहीले परीक्षणका रुपमा लगाएको स्कुस खेती सफल भएको बताउनुभयो । उहाँले पहिलो पटक नै एउटै बोटबाट तीन क्वीन्टल भन्दा बढी स्कुस फलेको बताउँदै तरकारी खेतीमा यसको संभावना राम्रो देखिएको बताउनुभयो । उहाँले एउटा बोट लगाएकोमा राम्रोसँग फल दिएको बताउनुभयो ।