भारतमा सङ्क्रमितको सङ्ख्या चार करोड तीस लाखबढी

भारतमा बिहीबार कोभिड–१९ सङ्क्रमितको सङ्ख्या चार करोड ३० लाख ३१ हजार ९५८ पुगेको छ । तीमध्ये पछिल्लो २४ घण्टामा देशभर १३ सय तीन नयाँ घटनाहरू दर्ता भएका संघीय स्वास्थ्य मन्त्रालयको जनाएको छ ।

यमनका राष्ट्रपतिद्धारा नयाँ परिषद् गठन

यमनका राष्ट्रपति अबेड्राब्बो मन्सुर हाडीले बिहीबार नयाँ परिषद् गठन गर्नुभएको छ । युद्धग्रस्त मुलुक यमनमा हुथी विद्रोहीसँग संघर्ष गरिरहेको सरकारलाई नयाँ स्वरुप दिन उहाँले उक्त उच्चस्तरीय परिषद् गठन गर्नु भएको हो ।

श्रीलङ्काली राष्ट्रपतिद्वारा आर्थिक विज्ञहरुको समूह नियुक्त

श्रीलङ्काली राष्ट्रपति गोटबाया राजपाक्छेले यहाँको अर्थतन्त्र, दिगो विकास र ऋणसम्बन्धी व्यवस्थाको अध्ययन गरी सुझाव दिनका लागि एक विज्ञ समूह नियुक्त गर्नुभएको छ ।श्रीलङ्काली राष्ट्रपतिको कार्यालयले बिहीबार प्रकाशन गरेको एक विज्ञप्ति सो कुरा जनाइएको छ । पछिल्लो समयमा श्रीलंकामा आर्थिक संकट परेको छ । सो संकटको समाधानका लागि उहाँले यो समूह नियुक्त गर्नुभएको छ ।

युक्रेनी सेनालाई अमेरिकी सेनाद्वारा ड्रोन प्रशिक्षण दिँदै

युक्रेनी सेनालाई अमेरिकी सेनाले रुसी सेनालाई परास्त गर्न सैन्य ड्रोन चलाउन प्रशिक्षण दिइरहेको छ । पेन्टागनका अनुसार अमेरिकाले युक्रेनलाई उपलब्ध गराउने स्विचब्लेड ड्रोन प्रयोग गर्न सिकाइरहेको छ । रुसले युक्रेन आक्रमण गर्नुपूर्व अमेरिकामा रहेका युक्रेनी सेनालाई सो सम्बन्धी सैन्य प्रशिक्षण दिइरहेको पेन्टागनका प्रवक्ता जोन किर्वीले बताउनुभएको हो ।

रुसी सेनाद्वारा युक्रेनको ज्यापोरिजियाका मेयर बर्खास्त

रुसी सेनाले युक्रेनको ज्यापोरिजियाका मेयरलाई बर्खास्त गरेको छ । किभ इन्डिपेन्डेन्ट समाचार वेभसाइटका अनुसार रुसी सेनाले ज्यापोरिजिया क्षेत्रका इनोर्होडार शहरका मेयर डिमिट्रो ओर्लोभलाई बर्खास्त गरेर नयाँ मेयरलाई नियुक्त गरेको छ ।