पहिराेमा परी एकजनाको मृत्यु   

घरमाथिबाट आएको पहिरामा पुरिएर एकजनाको मृत्यु भएको छ । मृत्यु हुनेमा गन्यापधुरा गाउँपालिका–१ भात्काडाका ३२ वर्षीय विष्णु अवस्थी छन् । जिल्ला प्रहरी कार्यालयका अनुसार आइतबार रातिदेखि निरन्तर आएको वर्षाका कारण घरमाथिबाट गएको पहिरामा पुरिएर अवस्थीको ज्यान गएको हो । जिल्लामा फोन नेटवर्क र विद्युत्समेत अवरुद्ध हुँदा अन्य क्षतिका बारेमा यकिन गर्न सकिएको छैन ।    

मानव सेवा आश्रम बन्ने

काठमाडौँ जिल्लाभित्र अव्यवस्थित रूपमा सडक पेटीमा बस्दै आएका मानवको व्यवस्थापन गर्नका लागि व्यवस्थित मानव सेवा आश्रम बन्ने भएको छ । नागार्जुन नगरपालिका–६ स्थित सेतो गुम्बासँगै रहेको १८ रोपनी जग्गामा मानव सेवा आश्रमको भवन निर्माण गर्न लागिएको हो । मानव सेवा आश्रम निर्माणका लागि काठमाडौँ महानगरपालिका, नागार्जुन नगरपालिका र मानव सेवा आश्रमबीच यसअघि नै त्रिपक्षीय सम्झौता भइसकेको छ ।

जनगणनामा थारुहरुकोे तथ्याङ्क नछुटाउन सचेतना कार्यक्रम

सुनसरीको इटहरीमा भएको एक कार्यक्रममा आगमी जनगणना २०७८ मा थारुहरुको वास्तविक तथ्यांक नछुटाउन आग्रहसहित सचेतना कार्यक्रम सम्पन्न गरिएको छ । थारु समुदायको सही तथ्याङ्क संकलन गरी सो समुदायको हक अधिकार सुनिश्चित्ता गर्न आवश्यक रहेको भन्दै थारु अगुवाहरुलाई सचेतना कार्यक्रम आयोजना गरिएको आयोजकले जनाएको छ ।

तस्बिरमा गोठपालककाे दिनचर्या

ताप्लेजुङको हिमाली क्षेत्रमा गोठपालन पेशा अँगाल्दै आएका स्थानीय किसानको चाडपर्व गोठमै बित्ने गरेको छ । गोठ तथा चरनमा रहेका याक÷चौंरीको रेखदेख र स्याहार सम्भारमै गोठपालक किसानको दशैँ तिहारजस्ता महत्वपूर्ण चाडपर्व पनि बित्ने गरेको हो ।

पाँच वर्षमा दुई किलोमिटर सडक कालोपत्रे भएन, स्थानीय आक्रोशित

बाँकेको खजुरा बजारको दुई किलोमिटर सडक विस्तार र कालोपत्रे गर्ने कार्य ५ वर्षमा पनि पुरा हुनसकेको छैन । ३ वर्षमा दुई किलोमिटर सडक विस्तारसँगै कालोपत्रे गर्ने भन्दै २०७४ चैतमा निर्माण कम्पनी गजुरमुखी निर्माण सेवाले सम्झौता गरेकोमा सम्झौता गरेको ५ वर्ष बिते पनि सडक निर्माण अझै अलपत्र छ ।