अमिरमैँया रञ्जित
ललितपुर, असोज १३ गते । नेपालभाषा केन्द्रीय विभाग पाटनमा करिब ३१२ हस्तलिखित ग्रन्थहरु संरक्षण गर्ने कार्य नेपालभाषा केन्द्रीय विभाग र सेन्टर फर स्टडिज अफ म्यानुस्क्रिप्ट कल्चरले संयुक्त रुपमा बुधबार प्रारम्भ गरेको छ ।
हस्तलिखित ग्रन्थहरुको संरक्षण गर्ने मुख्य उद्देश्य रहेको त्रिवि मानविकी तथा सामाजिक संकायका डीन प्रा.डा. कुसुम शाक्यले बताउनुभयो ।
सदियौंदेखि अलपत्र रहेका ग्रन्थहरुको अन्तिममा ‘मलाई पानी, तेल, आगो, चोर, मुर्ख र मुसा’बाट बचाउ भन्ने लेखिनुका साथै उक्त ग्रन्थहरु संरक्षण गर्नुको महत्व र उद्देश्यबारे कार्यक्रमका संयोजक तथा साउथ एसियन स्टडीका तर्फबाट बिदुर भट्टराईले बताउनुभयो ।
पुस्तकालय स्थापना गर्नु भनेको दण्डनीय अपराध मानिने राणाकालमा केशर पुस्तकालयको स्थापना गर्नुका साथै उक्त पुस्तकालयमा विश्वको कुनै पनि पुस्तकालयमा नपाइने १२ सय वर्ष पुराना ग्रन्थ संग्रहित रहेको केशर पुस्तकालयका प्रमुख दशरथ मिश्रले जानकारी दिनुभयो ।
नेपालभाषा विभागको पाठ्यक्रममा ०५६ सालदेखि अभिलेख विज्ञान विषयको पढाइ हुनुका साथै राष्ट्रिय अभिलेखालय, केशर पुस्तकालय र आशा सफुकुथिमा हस्तलिखित ग्रन्थहरु अध्ययन गर्न पाइन्छ तर उक्त ग्रन्थहरुको भावसहितको सम्पादित पाठ विभागमा मात्र रहेको विभागका प्रमुख डा. ओमकारेश्वर श्रेष्ठले जानकारी दिनुभयो । प्रत्येक घर घरमा रहेका ग्रन्थहरुलाई भौतिक रुपमा मात्र नभएर प्राज्ञिक संरक्षण गर्ने उद्देश्य रहेको उहाँले स्पष्ट पार्नुभयो ।
२०८१ मंसिर ७ शुक्रवार
