गोरखापत्र अनलाइन
मोरङ, चैत ३१ गते । मोरङको रतुवामाई नगरपालिकाले वडास्तरीय टी २० मेयर कप क्रिकेट प्रतियोगिता २०७७ को आयोजना गर्ने भएको छ ।
मंगलबार नगर युवा तथा खेलकुद समितिले पत्रकार सम्मेलनको आयोजना गरि खेलसम्बन्धी जानकारी गराएको हो ।
प्रतियोगितामा नगरका १० वटा वडाले प्रतिस्पर्धा गर्नेछन् । नगरको नौ लाख एक हजार रुपियाँ आर्थिक सहयोगमा हुने क्रिकेट प्रतियोगिताका विजेतालाई एक लाख रुपियाँसहित ट्रफी र उप विजेतालाई ५० हजार रुपियाँसहित ट्रफी प्रदान गरिनेछ ।नगरको वार्ड नं.७ स्थित गढीझार क्रिकेट मैदानमा हुने प्रतियोगितामा विभिन्न सात विधामा पुरस्कार दिइनेछ । यस्तै प्रत्येक खेलमा एकजनालाई म्यान अफ द म्याच सहित नगद ३ हजार र ट्रफी प्रदान गरिनेछ ।
नगर युवा तथा खेलकुद समितिका अध्यक्ष मंगलसिंह चोङवाङले प्रतियोगिता वैशाख १० गतेसम्म सुरक्षा सावधानी अपनाएर आयोजना गरिने बताउनुभयो ।
खेलकुद समितिका सदस्य सचिव – सुदीप जैसवालले भन्नुभयो –गत फागुन ४ गते समिति गठन भएपछि पहिलोपटक क्रिकेट प्रतियोगिता आयोजना गर्न लागिएको हो । गतवर्ष मेयर कप फुटबल आयोजना गरेको नगरले हरेक वर्ष खेलकुदका विभिन्न कार्यक्रम गर्दै आएको छ ।
