पेरिस, कात्तिक २८ गते । किलियन एमबापेले चार गोल गरेपछि विश्व विजेता फ्रान्सले शनिबार राति काजखस्तानलाई ८–० ले हराएर आगामी वर्षको हुने विश्वकप फुटबल प्रतियोगितामा स्थान सुनिश्चित गरेको छ । सोही राति बेल्जियम पनि जितसहित विश्वकपमा चयन भयो । नेदरल्यानड्स भने अन्तिम समयमा दुई गोल a]होरेपछि विश्वकपमा छनोट हुन पर्खनुपर्ने भएको छ ।
बेल्जियमले घरेलु मैदानमा इस्टोनियालाई ३–१ ले पराजित गर्यो । यस जितपछि दास्रो स्थानमा रहेको वेल्सलाई पाँच अङ्कले पछाडि पार्दै बेल्जियम विश्वकपमा चयन भयो । वेल्सले पनि आफनो मैदानमा बेलारुसलाई ५–१ ले सहजै हराएको थियो ।
पछिल्लो विश्वकपमा चयन हुन नसकेको नेदरल्यान्ड्सले मोन्टेनेग्रोविरुद्धको खेलमा २–० को अग्रतासहित आफूलाई विश्वकप चयनको नजिक पारेको थियो । नेदरल्यान्ड्सका लागि दुवै गोल मेम्पिस डिपेले गर्नुभएको थियो । तर मोन्टेनेग्रोले अन्तिम आठ मिनेटमा दुई गोल गरेपछि नेदरल्यान्ड्स हिस्स भयो । एक खेल बाँकी रहेको स्थितिमा टर्की र नर्वे दुई अङ्कले नेदरल्यान्ड्सभन्दा पछाडि छन् ।
