काठमाडौँ, पुस १८ गते । नेपाल क्रिकेट संघ (क्यान) र अनुशासन कारबाही गरिएका चार खेलाडीबीच सहमति भएको छ । क्यान पदाधिकारी र खेलाडीबीच आइतबार छलफल गरेर सहमति गरिएको क्यानका अध्यक्ष चतुरबहादुर चन्दले जानकारी दिनुभयो ।
सहमति अनुसार क्यानले यसअघिका नियमित कप्तान ज्ञानेन्द्र मल्ल, उपकप्तान दीपेन्द्र, सिंह ऐरी, सोमपाल कामी र कमलसिंह ऐरीमाथि सन् २०२२ को सुरुवाती ६ महिना सेन्ट्रल कन्ट्रयाक्टमा लगाएको प्रतिबन्ध फुकुवा गर्न तयार भएको छ ।
क्यानका अनुसार कप्तान सन्दीप लामिछानेलाई दिनेमा दुवै पक्षबीच सहमति भएको छ । यसअघि खेलाडीको श्रेणी विभाजन र सेन्ट्रल कन्ट्रयाक्टको विषयमा असहमति जनाउँदै मल्ल लगायत खेलाडीले क्यानविरुद्ध प्रचारबाजी गरेको भन्दै कारबाही गरिएको थियो ।
क्यान बोर्ड बैठकले मल्ललाई कप्तान र ऐरीलाई उपकप्तानबाट पदमुक्त गर्दै सन्दीपलाई कप्तानमा नियुक्त गरेको थियो । खेलाडीले भने क्यानको निर्णयमा असन्तुष्ट जनाउँदै प्रशिक्षणमा सहभागी नहुने अडान राख्दै आएका थिए । क्यानले शनिबार प्रशिक्षणका लागि ३० खेलाडी बोलाएपनि १६ खेलाडी मात्र उपस्थित थिए ।
आइतबार साँझ खेलाडी र क्यानका पदाधिकारीबीच सहमति भएसँगै सोमबारबाट सबै खेलाडी आईसीसी टी–२० विश्वकप ग्लोबल छनोटको तयारीका लागि बन्द प्रशिक्षणमा सहभागी बन्न सहमत भएका छन् ।
प्रशिक्षक पुबुदु दसानायकेको निगरानीमा नेपाली टोलीले सोमबारदेखि कीर्तिपुरमा प्रशिक्षण क्याम्प सुरु गर्नेछ । बन्द प्रशिक्षणका लागि यसअघिनै क्यानले ३० जना प्रारम्भिक खेलाडी टोलीको घोषणा गरिसकेको छ ।
