काठमाडौँ, फाल्गुन ७ गते । आईसीसी टी–२० विश्वकप ग्लोलब छनोट अन्तर्गत फिलिपिन्सबिरुद्धको खेलमा नेपालका ओपनर कुशल भुर्तेल ‘म्यान अफ दि म्याच’ हुनुभएको छ । नेपाललाई १ सय ३६ रनको फराकिलो जित दिलाउन शतक प्रहार गर्नुभएका कुशलले अविजित एक सय चार रन बनाउनुभएको थियो ।
कुशलले ५७ बलमा आफ्नो पहिलो अन्तर्राष्ट्रिय शतक प्रहार गर्नुभएको हो । उहाँ टी–२० अन्तर्राष्ट्रियमा शतक प्रहार गर्ने तेस्रो खेलाडी बन्नुभएको छ । यसअघि पूर्व कप्तानद्वय पारस खड्का र ज्ञानेन्द्र मल्लले शतक बनाउनुभएको थियो । फिलिपिन्सविरुद्धको जितसँगै सेमिफाइनल समिकरण रोचक बन्ने देखिएको छ । दुई खेल जितेको नेपाल चार अंकसहित शीर्षस्थानमा छ । क्यानडा र ओमानले समान दुई अंक बनाएको छ ।
नेपालले पहिलो खेलमा घरेलु टोली ओमानलाई ३९ रनले हराएको थियो । नेपालले समूह चरणको अन्तिम खेल सोमबार क्यानडासँग खेल्नेछ । उक्त खेलमा विजयी भएमा नेपाल समूह विजेता रुपमा सेमिफाइनल खेल्नेछ । पराजित भएमा नेपालको सेमिफाइनल खेल्ने सम्भावना रनरेटमा निर्भर गर्नेछ । शनिबारनै भएको अर्को खेलमा ओमानले क्यानडालाई नौ विकेटले हराएपछि सेमिफाइनल समिकरण रोचक बनेको हो ।
