रसुवा समाचारदाता
रसुवा, साउन ५ गते । रसुवाको आमाछोदिङ्मो गाउँपालिकाको सिम्बु गाउँमा निर्माण भइरहेको माथिल्लो साञ्जेन जलविद्युत् आयोजनाको पावरहाउसमा उपकरण जडानको तयारी भइरहेको छ । दुई अर्ब दुई करोड रुपियाँको लागतमा १४.८ मेगावाट विद्युत् उत्पादन क्षमता रहेको आयोजनाको अधिकांश संरचना निर्माण पूरा भइसकेको छ ।
४२ मेगावाट क्षमताको साञ्जेन जलविद्युत् आयोजनाको निर्माण पनि तीव्ररूपमा भइरहेको आयोजना प्रमुख सुदनसिंह महतले जानकारी दिनुभयो ।
आमाछोदिङ्मो गाउँपालिका–५ को तिलोचे खोलामा १४ मिटर लामो बाँध, एक हजार ३८० मिटर लामो सुरुङ, ३४५ मिटरको पेनस्टक पाइप जडान सम्पन्न भइसकेको छ । २०७८ भित्रै विद्युत् उत्पादन गर्ने लक्ष्यसाथ काम भइरहेको र उपकरण जडानको काम सुरु हुन लागेको आयोजना प्रमुख महतले जानकारी दिनुभयो । अहिले अधिकांश उपकरण आयोजना स्थलमा आइसकेको र कोभिड–१९ का कारण उपकरण जडानमा ढिलाइ भएको हो ।
साञ्जेन र माथिल्लो साञ्जेन जलविद्युत् आयोजनाको जडित क्षमता करिब ५७ मेगावाट छ । बाढीपहिरो, पेट्रोलियम पदार्थको अभाव, भूकम्प र कोभिड–१९ को जोखिमलगायतका कारण दुवै आयोजनाको निर्माणमा ढिलाइ भएको छ । निर्माणाधीन दुवै साञ्जेन आयोजनाको कुल सात अर्ब २४ करोड रुपियाँ लागत अनुमान गरिएको छ । साञ्जेन जलविद्युत् आयोजनाको पावरहाउस र हेडवक्र्सको सुरुङ खन्ने कार्य भइरहेको छ ।
चिलिमे आयोजनाको सफलतापछि माथिल्लो साञ्जेन, साञ्जेन, रसुवागढी, त्रिशूली १, माथिल्लो त्रिशूली थ्री ए, माथिल्लो त्रिशूली थ्री बी, अपर मैलुङ, लाङटाङलगायतका आयोजना निर्माणाधीन छन् ।