प्युठान समाचारदाता
प्युठान, साउन ८ गते । छ वर्षअघि एउटा बाँसको टनेलबाट तरकारी खेती सुरु गर्नुभएका प्युठानको स्वर्गद्वारी नगरपालिका–९, जुडापाटा खैरेनीका पूर्णबहादुर घर्ती मगरको तकारी खेती अहिले १२ रोपनी क्षेत्रफलमा फैलिएको छ ।
वैदेशिक रोजगारीबाट फर्किएपछि घर्तीमगरले सुरुमा १५/२० हजार रुपियाँ मात्र लगानी गरी तरकारी खेती थाल्नुभएको हो ।
अहिले उहाँको तरकारी खेती विस्तारसँगै लगानी पनि बढेको छ । आफ्नो र छिमेकीको जग्गा भाडामा गरी १२ रोपनी क्षेत्रफलमा मौसमी तथा बेमौसमी तरकारी खेती गर्दै आएको घर्तीमगर बताउनुहुन्छ । उहाँले भन्नुभयो, “खेती गर्दै जाँदा तरकारी राम्रो भएपछि टनेल पनि विस्तार भएको छ । अहिलेसम्म राम्रो उत्पादन भइरहेको छ । ”
लुम्बिनी प्रदेश सरकारको १२ लाख ५० हजार अनुदान रकमसहित हालसम्म तरकारी खेतीमा ३५ लाख रुपियाँ लगानी पुगेको छ । तरकारी खेतीबाट मासिक ३० हजारदेखि एक सिजनमा डेढ लाख रुपियाँसम्म आम्दानी गरेको घर्तीमगरको अनुभव छ ।
घर्तीमगरको सुवेक्षा कृषि फार्ममा सिँचाइको भने समस्या छ । उहाँले पानीको समस्याले गर्दा थोपा सिँचाइको प्रयोगबाट हालसम्म खेती गर्दै आएको बताउनुभयो । सोलार लिफ्टबाट सिँचाइको व्यवस्था गर्ने प्रयास गरेको उहाँको भनाइ छ ।
तरकारी खेतीमा उहाँकी श्रीमती नमा जीएमसँगै आमा र बहिनीले सघाउँदै आउनुभएको छ । तरकारी खेतीबाटै एक जना भाइलाई कृषिमा उच्च शिक्षाको अध्ययन गराइरहेको उहाँले जानकारी दिनुुभयो । विदेशबाट फर्किएर तरकारी खेती गर्न लागि स्मार्ट कृषि एपबाट सहयोग लिएर तालिमसमेत पाएको उहाँले बताउनुभयो ।
उहाँले मुख्य तरकारी बालीमा टमाटर खेती गर्दै आउनुभएको छ । वार्षिक एक सय क्विन्टलभन्दा बढी टमाटर बिक्री गर्ने गरेको घर्तीमगरले बताउनुभयो ।
