गोकर्ण दयाल
बैतडी, साउन १७ गते । नेपाल–भारतका स्थानीय तहका जनप्रतिनिधिले संयुक्त रूपमा साउन १५ को अवसरमा खीर खाएर बैतडीको तिरखडेनीमा संयुक्त रोपाइँ गरेका छन् । बैतडीको दशरथचन्द नगरपालिका–१०, तिरखडेनीमा महाकाली नदीको पानी लिफ्ट गरेर सिँचाइ सुविधा पुगेपछि मकै भाँचेर पहिलो पटक गाउँमा रोपाइँ भएको हो ।
रोपाइँ कार्यक्रममा बैतडीको दशरथचन्द नगरपालिकाका प्रमुख नरेन्द्रसिंह थापा, जिल्ला समन्वय समितिका संयोजक सिद्धराज भट्ट, नेपाली काँग्रेस बैतडीका उपसभापति चतुरबहादुर चन्द र भारतको पिथौरागढ जिल्लाको बलतडी ग्राम सभाका सभापति गोपी राम, सदस्य उमेशचन्द्र भट्टलगायत बैतडीको तिरखडेनीमा रोपाइँ विशेष कार्यक्रममा सहभागी हुनुभएको थियो ।
छेउमै महाकाली बगे पनि सदियौँदेखि आकाशे पानीको भरमा खेती गर्दै आएका तिरखडेनीवासीले पहिलो पटक महाकालीको पानीबाट रोपाइँ गर्न पाएकामा बाजागाजासहित नेपाल–भारतका स्थानीय तहका जनप्रतिनिधि र लिफ्ट सिँचाइ योजना निर्माण गर्ने संस्थाका पदाधिकारीलाई स्वागत गरेका थिए ।
महाकाली नदीको पानी लिफ्ट गरेर गाउँमा सिँचाइ पुगेपछि एक वर्षमा चारवटा खेती गर्न पाएको स्थानीय महिला किसान शान्ति बुडालले बताउनुभयो ।
अगुवा महिला किसान बुडालले भन्नुभयो, “छेउमै महाकाली नदी बगे पनि गाउँमा पानीको हाहाकार थियो । आकाशे पानीको भरमा वर्षमा मुस्किलले दुईवटा खेती हुन्थ्यो । अहिले महाकालीको पानी लिफ्ट गरेर गाउँमा सिँचाइ सुविधा पुगेपछि एक वर्षमा तरकारी खेती, गहुँ बाली र मकै बाली भित्र्याएर अहिले चौथो बालीका रूपमा रोपाइँसमेत गर्न भ्याएका छौँ । ”
खीर खाएर तिरखडेनी गाउँमा रोपाइँमा सहभागी बैतडीको दशरथ चन्द नगरपालिकाका नगरप्रमुख नरेन्द्रसिंह थापाले महाकाली नदीबाट पानी लिफ्ट गरेर सिँचाइ योजना निर्माण गर्ने स्थानीय रुडेस संस्थालाई धन्यवाद दिनुभयो ।
उहाँका अनुसार नगरपालिकाको १५ लाख रुपियाँ सामाजिक संस्था रुडेसले प्राविधिक सहयोग गरेकामा सिँचाइ आयोजना तयार भएको हो ।
पहिलो पटक महाकाली नदीको पानी लिफ्ट गरेर नेपाली गाउँमा सिँचाइ पु-याउन निकै सङ्घर्ष गर्नुपरेको स्थानीय सामाजिक संस्था रुडेस बैतडीका कार्यकारी निर्देशक गोविन्दराज जोशीले बताउनुभयो ।
महाकाली नदीको पानी लिफ्ट गरेर नेपालको बन्जर खेत सिञ्चित भएको देख्दा निकै खुसी लागेको भारतको पिथौरागढ जिल्लाको बलतडी ग्राम सभाका सभापति गोपी रामले बताउनुभयो ।
सभापति गोपी रामले भन्नुभयो, “मित्र राष्ट्र नेपालले महकाली नदीको पानी लिफ्ट गरेर बञ्जर खेत हराभरा गरेको छ । यस्तो रचनात्मक कामबाट महाकाली किनारमा बसोबास गर्ने भारतीयले पनि प्रेरणाका रूपमा लिएका छौँ । हामी पनि अब नेपालबाट सिक्नेछौँ । ”
नेपाली काँग्रेस बैतडीका उपसभापति चतुरबहादुर चन्दले लिफ्ट सिँचाइ योजनाको दिगोपनामा जोड दिँदै महाकाली नदीको पानी पहिलो पटक नेपाली गाउँमा उपभोग गर्न पाएकामा खुसी व्यक्त गर्नुभयो ।
