गोरखापत्र समाचारदाता
काठमाडौँ, साउन २१ गते । नेपाल राष्ट्र बैङ्कका गभर्नर महाप्रसाद अधिकारीले चालू आर्थिक वर्ष २०७८/७९ को मौद्रिक नीतिको तयारी लगभग पूरा भएको बताउनुभएको छ । सरकार परिवर्तन भएकाले नयाँ सरकारको योजना र प्राथमिकता हेरेर मात्रै त्यसलाई अन्तिम रूप दिन सकिने उहाँले बताउनुभयो । प्रतिनिधि सभाको अर्थ समितिको बैठकमा बोल्दै गभर्नर अधिकारीले सरकार परिवर्तन भइसकेपछि नयाँ सरकारको प्राथमिकता र प्रक्षेपणलाई हेरेर मौद्रिक नीति ल्याउनुपर्ने भएकाले त्यसलाई पर्खेर बसेको बताउनुभयो । उहाँले नयाँ सरकारको बजेटको आकार, प्राथमिकता र प्रक्षेपण हेरेर मात्रै मौद्रिक नीति सार्वजनिक गर्नुपर्ने अवस्था आएको स्पष्ट गर्नुभयो ।
मौद्रिक नीतिले यस वर्ष पनि कोरोना प्रभावित क्षेत्र र व्यवसायीलाई सहुलियत दिने कामलाई निरन्तरता दिने अवस्था रहेको उहाँले बताउनुभयो । कोरोनाको तेस्रो लहरसमेत आउने अवस्था रहेकाले कोरोनाको रोकथाम, नियन्त्रण र व्यवसाय टिकाउन सरकारले सहुलियत दरमा ऋण दिने कामलाई नै प्राथमिकता दिने अवस्था अहिले पनि कायमै रहेको गभर्नर अधिकारीले बताउनुभयो ।
व्यापार घाटालाई कम गर्न विलासिताका र अनावश्यक वस्तुको आयातमा रोक लगाउने तथा आयात प्रतिस्थापनका लागि सञ्चालनमा आएका व्यवसायलाई कर्जा प्रवाह गर्ने नीति लिइएको उहाँको भनाइ थियो । गभर्नर अधिकारीले कोरोनाका कारण धेरै फरक पारेर मौद्रिक नीति ल्याउन सकिने अवस्था नरहेको भन्दै कृषि, पर्यटन र मनोरञ्जन क्षेत्रलाई टिकाइराख्न पनि सरकारले सहुलियत दरमा कर्जा प्रवाह गर्नुपर्ने अवस्था रहेको बताउनुभयो ।
बैठकमा अर्थ समितिका सदस्यहरूले व्यापार घाटा बढ्दो अवस्थामा रहेकामा चिन्ता व्यक्त गर्दै त्यसलाई न्यूनीकरण गर्दै लैजाने उपायको खोजी गर्न राष्ट्र बैङ्कको ध्यानाकर्षण गराउनुभएको थियो । समितिका सदस्य एवं पूर्वअर्थमन्त्री वर्षमान पुनले व्यापार घाटा कम गर्न विलासिताका वस्तुको आयातमा रोक लगाउनुपर्नेमा जोड दिनुभयो । समितिका सभापति कृष्णप्रसाद दाहालले एक करोडभन्दा माथिका ऋणीहरूलाई ब्याजदरमा सहुलियत नदिएर भए पनि मुलुकको अर्थतन्त्र सुदृढ गराउने गरी मौद्रिक नीति ल्याउन राष्ट्र बैङ्कको ध्यानाकर्षण गराउनुभएको थियो । ठूला उद्योगीलाई सहुलियत दरको ब्याजमा कर्जा प्रवाह गर्दा मुलुकको अर्थतन्त्र धराशयी हुने अवस्था रहेको उहाँले बताउनुभयो ।
२०८२ भाद्र १४ शनिवार
