मकवानपुर समाचारदाता
हेटौँडा, साउन २५ गते । भारतको पार्ले प्रोडक्ट प्रालिको चकलेट नेपालमा नै उत्पादन हुने भएको छ । उक्त कम्पनीको बिस्कुट उत्पादन गर्दै आएको एन्टार्टिक बिस्कुट प्रालि परिसरमा चकलेट उत्पादन गर्ने प्लान्ट स्थापना सुरु भएको छ ।
एक वर्षभित्रमा पार्लेका अरेन्ज वाइट र म्याङ्गो ब्रान्डका चकलेट उत्पादन गर्नेगरी सात करोड २५ लाख रुपियाँको लागतमा उद्योग स्थापना सुरु गरिएको छ ।
एन्टार्टिक बिस्कुट प्रालि हेटौँडाका प्रशासन प्रबन्धक रामहरि न्यौपानेले कम्पनीको कुल लागतमध्ये चार करोड रुपियाँको लागतमा उद्योग भवन निर्माण हुने बताउँदै उद्योगको वार्षिक १५ सय टन चक्लेट उत्पादन क्षमता हुने जानकारी दिनुभयो ।
पार्लेको चकलेट (कन्फेक्सनरी) प्लान्ट सञ्चालनमा आएपछि ४० जनाले प्रत्यक्ष रोजगारीको अवसर पाउने भन्दै प्रशासन प्रबन्धक न्यौपानेले चकलेटमा प्रयोग हुने अधिकांश कच्चा पदार्थ नेपालकै प्रयोग हुने र क्रमशः चकलेट उत्पादनमा विविधीकरण गर्दै लैजाने बताउनुभयो ।
संयुक्त लगानीको एन्टार्टिक बिस्कुट प्रालिबाट पार्लेजी, ट्वान्टी–ट्वान्टी, मारी, म्याजिक, क्रिम बिस्कुटलगायतका पार्ले ब्रान्डका बिस्कुट उत्पादनसँगै उक्त कम्पनीको भारतबाट हुँदै आएका अधिकांश आयात रोकिएका छन् ।
न्यौपानेले पार्लेका केही ब्रान्डका बिस्कुट अझै आयात भइरहेको भन्दै करिब ६० करोड रुपियाँको लागतमा स्थापना भएको बिस्कुट उद्योगमा ३५० जनाले अहिले प्रत्यक्ष रोजगारीको अवसर पाइरहेको बताउनुभयो । पार्ले प्रोडक्ट प्रालिले नेपाली लगानीकर्तासहित तत्कालीन मकवाना बिस्कुट उद्योग खरिद गरी २०६८ बाट एन्टार्टिक बिस्कुट प्रालिका नाममा बिस्कुट उत्पादन थालेको हो ।
एन्टार्टिक बिस्कुट उद्योगबाट वार्षिक हजार टन बिस्कुट उत्पादन गर्दै आएको कम्पनीले नेपालगञ्जमा समेत उद्योग स्थापना गर्ने योजनासहित जग्गा खरिद गरेको छ ।
