आशा साह, दृश्यमा मनाेरजत्न शाही/केशब गुरूङ्ग
काठमाडौं, साउन २६ गते । तपाईहरुले दैनिक भान्सामा प्रयोग गर्ने तरकारी वा दैनिक रुपमा खाने गर्नुभएको फलफूलमा विषादीको मात्रा कति छ भनेर कसरी थाहा पाउने ? यसको जानकारी पाउनका लागि विषादी परीक्षणा प्रयोगशालाकै आवश्यक पर्छ, उपभोक्ताले हेररे वा छामेर विषादी प्रयोग भएको वा नभएको थाहा पाउन सकिँदैन ।
उपभोक्ताले तरकारी र फलफूलमा विषादी थाहा पाउन नसक्ने भएकाले प्रयोगशालाबाट वैज्ञानिक परीक्षण भएर आएको तरकारी वा फलफूलमात्रै ढुक्कसँग खान सकिन्छ । तर, अहिले पनि नेपालमा परीक्षणै नभई बजारमा पुग्ने गरेको तरकारी तथा फलफूल प्रशस्तै पाइने गरेको छ ।
परीक्षण नभइ बजामा तरकारी तथा फलफूल आउने समस्या त छँदैछ तर, विषादी परीक्षणमा प्रयोग हुने प्रविधिको अझै समस्या छ । अहिलेसम्म नेपालले ताइवानको प्रविधिमा भर पर्नुपरिरहेको कालिमाटी बाली संरक्षण इकाइ प्रमुख प्रकाश घिमिरे बताउनुहुन्छ ।
इकाइ प्रमुख घिमिरेले कालिमाटीमा अहिले पनि दैनिक रुपमा तरकारी तथा फलफूलमा विषादी परीक्षण भइरहेको बताउनुहुन्छ । कालीमाटीमा स्वदेश तथा विदेशबाट आउने गरेको तरकारी तथा फलफुलमा विषादी परीक्षण हुने गरेको बताउनुभयो ।
कालीमाटी तरकारी तथा फलफुल बजारमा रहेको कृषि प्रयोगशालामा हरेक दिन बिहान बजारमा आएका तरकारीको नमूना परीक्षणको लागि लगिने उहाँले बताउनुभयो । थाेरै जनशक्ति र कालीमाटीमा मात्र केन्द्रित परीक्षणले भने हामीले खाने फलफूल र तरकारी विषादी मुक्त छन भन्न सक्ने अबस्था छैन ।
