गोरखापत्र समाचारदाता
काठमाडौँ, साउन २८ गते । स्वास्थ्य तथा जनसङ्ख्या राज्यमन्त्री उमेश श्रेष्ठले कोभिड–१९ विरुद्धको खोपमा निजी क्षेत्रलाई प्राथमिकतामा राख्ने बताउनुभएको छ । नेपाल उद्योग परिसङ्घको प्रतिनिधि मण्डलसँगको भेटमा स्वास्थ्य राज्यमन्त्री श्रेष्ठले अर्थतन्त्र चलायमान बनाउने निजी क्षेत्रलाई खोपमा प्राथमिकता दिने बताउनुभएको हो ।
राज्यमन्त्री श्रेष्ठले नेपाललाई आवश्यक पर्ने खोप खरिदको सम्पूर्ण प्रबन्ध पूरा भइसकेको भन्दै अबको डेढ महिनामा एक करोड तीन लाख डोज खोप नेपाल आइपुग्ने भन्दै सबैलाई सहज रूपमा खोप उपलब्ध गराउने उल्लेख गर्नुभयो । आगामी चैतसम्ममा पाँच करोड ५० लाख डोज खोप नेपाल आउने उहाँले स्पष्ट गर्नुभयोध्र
बढी घनत्व भएको ठाउँका खोप केन्द्रमा अलि भीडभाड देखिएको भन्दै उहाँले अहिले खोप केन्द्र बढाएको जनाउँदै सबैलाई सबैलाई खोप दिने प्रतिबद्धता जनाउनुभयो । कोभिड–१९ को तेस्रो लहरको जोखिम बढेको भन्दै उहाँले त्यसविरुद्ध लड्न डेडिकेटेड अस्पताल र अक्सिजनको समेत व्यवस्थापन गर्न सरकार लागिरहेको बताउनुभयो ।
भेटका क्रममा परिसङ्घका अध्यक्ष विष्णुकुमार अग्रवालले उद्योगी–व्यवसायीले अग्रपङ्क्तिमा रही काम गरेर अर्थतन्त्रलाई चलायमान बनाइरहेको भन्दै देशभरका उद्यमीलाई खोप वितरणमा प्राथमिकता दिन आग्रह गर्नुभएको थिया ।
२०८२ भाद्र १३ शुक्रवार
