गोरखापत्र समाचारदाता
काठमाडौँ, साउन ३१ गते । नेपाल राष्ट्र बैङ्कका पूर्वगभर्नर डा. चिरञ्जीवी नेपालले कोरोनाले सिर्जना गरेको विषम अवस्थालाई सम्बोधन गर्नेगरी सरकारले मौद्रिक नीति ल्याएको बताउनुभएको छ ।
शनिबार राजधानीमा आयोजित एक अन्तरक्रिया कार्यक्रममा उहाँले कोभिड–१ ९ले सिर्जना भएको अप्ठ्यारो अवस्थामा सरकारले केही गर्नुपर्छ भन्ने आमजनताको चाहनाअनुसार मौद्रिक नीति आएको बताउनुभयो ।
उहाँले भन्नुभयो, “मौद्रिक नीति कोरोनाले पारेको असरलाई राहत प्याकेजका रूपमा आएको छ । यसले आमजनताको आत्मबल बलियो बनाउन सहयोग पुग्ने विश्वास गर्न सकिन्छ । ” उहाँले कोरोनाको तेस्रो लहरमा आए पनि यो मौद्रिक नीतिले आर्थिक पुनस्र्थापनमा सहयोग पुग्ने बताउनुभयो ।
केन्द्रिय बैङ्क सुविधासहुलियत दिने संस्था नभएको स्पष्ट पार्दै उहाँले भन्नुभयो, “सुविधा, सहुलियत, अप्ठ्यारो बेलामा पर्दा दिने भनेको सरकारले हो । जुन बजेटमार्फत नै आउनुपर्छ । अप्ठ्यारो पर्दा केन्द्रित बैङ्कले पनि राहत प्याकेज ल्याउनुपर्ने कुराको अहिले आएर आवश्यकता महसुस भएको हो । ”उहाँले भन्नुभयो, “केन्द्रीय बैङ्कको सबभन्दा ठूलो र महत्त्वपूर्ण काम भनेको मुद्रास्फीतिलाई नियन्त्रणमा राख्ने, वित्तीय स्थायित्व हेर्ने हो । ”
देशको अर्थतन्त्र सुधार गर्नका लागि कोराना खोपको व्यवस्था सुलभ हुनुपर्नेमा जोड दिँदै उहाँले खोप नै पहिलो, दोस्रो र तेस्रो प्राथमिकता हुनुपर्ने धारणा राख्नुभयो ।
पूर्वगभर्नर दीपेन्द्रबहादुर क्षेत्रीले ढिलैगरी आएको भए पनि मौद्रिक नीतिको कार्यान्यवन पाटोमा ध्यान दिनुपर्नेमा जोड दिनुभयो । मौद्रिक नीतिको आधार नै बजेट भएकाले अब यसलाई सही तवरले कार्यान्वयन गरेर जाँदा नै मुलुक र जनताका लागि हितकर हुने उहाँको
भनाइ छ ।
मौद्रिक नीतिमा राहत र पुनस्र्थापनाबारे कुरा गरिए पनि सोहीअनुरूप कार्यान्वयन पक्ष प्रभावकारी नहुनु राम्रो नभएको उहाँको भनाइ छ । उहाँले भन्नुभयो, “यसअघिको मौद्रिक नीतिले निजी क्षेत्रलाई पनि आशावादी बनाएको थियो तर कार्यान्वयनको पक्षमा अलिकति कमजोर भयो । अहिले आएको नीतिमा कसिलो मौद्रिक नीतिको आवश्यकता हो भनिएको छ । अहिले आएको मौद्रिक नीतिमा साना, लघु, मझौला व्यवसायीलाई प्राथमिकता दिने भनिएको छ, यो राम्रो कुरा हो । ”
