नारायणगढ समाचारदाता
भरतपुर, भदौ ४ गते । अन्डाको माग बढेसँगै बजारमा मूल्यमा एकरूपता हुन छाडेको छ । पसलैपिच्छे अन्डाको मूल्य फरक हुँदा उपभोक्ता मारमा परेका छन् ।
“अहिले बजारमा एउटा अन्डा २० रुपियाँसम्ममा कारोबार भएको छ,” भरतपुरकी एक गृहिणीले भन्नुभयो, “त्यही अन्डा कतै १५/१६ रुपियाँमा पनि खरिद गर्न पाइन्छ । ” नेपाल अन्डा उत्पादक सङ्घले अन्डाको मूल्य निर्धारण गर्छ । चितवनको बजारमा सङ्घले अहिले ठूलो अन्डा क्रेटको ३९० रूपियाँ र मध्यम अन्डाको मूल्य क्रेटको ३६० रुपियाँ कायम गरेको छ ।
सङ्घले तोकेको क्रेटको ३९० रुपियाँ मूल्यलाई आधार बनाउने हो भने पनि एउटा अन्डाको मूल्य १३ रुपियाँ पर्छ । एक क्रेटमा ३० वटा अन्डा हुन्छन् । यो खरिद मूल्यमा २० प्रतिशत नाफा राख्ने हो भने पनि प्रतिगोटा दुई रुपियाँ ६० पैसा जोडेर अन्डा बिक्री गर्नुपर्ने हुन्छ तर व्यवसायीको मनोमानीले अहिले उपभोक्ता बढी मूल्य तिरेर अन्डा खान बाध्य भएका छन् ।
नेपाल अन्डा उत्पादक सङ्घका अध्यक्ष शिवराम केसी अन्डाको मूल्य मनोमानी रोकिनुपर्ने धारणा राख्नुहुन्छ । “सङ्घले तोकेको मूल्यमा अन्डाको कारोबार हुने हो भने अहिले देखिएको मनोमानी रोकिनेछ तर त्यो अवस्था देखिँदैन,” उहाँले भन्नुभयो । पछिल्लो समय बजारमा अन्डाको माग अत्यधिक बढेकाले पनि मागअनुसार उत्पादन हुन नसक्दा मूल्य बढेको पनि उहाँले जनाउनुभयो ।
अन्डा प्रोटिनयुक्त खाना हो । कोरोना सङ्क्रमणका बेला शरीरमा प्रोटिनको मात्रा बढाउन पनि अहिले अन्डाको खपत सामान्य अवस्थामा भन्दा शतप्रतिशत बढेको अध्यक्ष केसी बताउनुहुन्छ ।
“माग बढ्यो भन्दैमा उपभोक्ता ठग्न पाइँदैन । कहीँकतै मनोमानी भएको रहेछ भने अनुगमन गरेर कारबाही गरिनुपर्छ,” उहाँको भनाइ छ ।
चितवनमा अन्डाको खुद्रा कारोबार मुख्य रूपमा किराना व्यवसायीहरूले नै गर्छन् । किराना व्यवसायी सङ्घका अध्यक्ष रवीन्द्रकुमार श्रेष्ठ अन्डा खरिद नै बढी परेकाले बढी मूल्य लिएर बिक्री गर्नुपरेको गुनासो गर्नुहुन्छ ।
“एक क्रेट अन्डालाई हामीले ४१० देखि ४२० रुपियाँसम्म तिर्छौं अनि खुद्रा कतिमा बेच्ने ?” उहाँको प्रश्न छ ।
नेपालमा अन्डा उत्पादनका लागि ४० लाख लेयर्स कुखुरा पालिएका छन् । जसबाट २५ लाख गोटा अन्डा दैनिक उत्पादन हुने अन्डा व्यवसायी सङ्घसँग तथ्याङ्क छ । चितवनमा लेयर्सको सङ्ख्या १४ लाख र यसले दैनिक साढे १० लाख अन्डा उत्पादन गर्ने कुखुरा व्यवसायी मञ्चका कार्यकारी निर्देशक शिवप्रसाद बरालले बताउनुभयो ।
