राजेन्द्र ठगुन्ना
अमरगढी, कात्तिक ५ गते । डडेल्धुरा गन्यापधुरा गाउपालिका २ मा रहेको गणेश माध्यमिक विद्यालय बडालको विद्यालय भवनमा पहिरोले क्षति गरेको छ । सुदुरपश्चिम प्रदेशमा कात्तिक १ गतेदेखि ३ गतेसम्म परेको अविरल वर्षाका कारण विद्यालयका १२ वटा कक्षा कोठा र १० वटा छात्राबासका कोठाहरु पहिरोले पुरिएको विद्यालयका प्रध्यानाध्यापक सुरेन्द्र कार्कीले बताउनुभयो ।
उहाँले भन्नुभयो “कोरोनाले गर्दा लामो समयपछि पठन पाठन सुरु भएको थियो, पहिरोले विद्यालयको भवन भत्काएपछि विद्यार्थीलाई पठन पाठन गराउन कक्षा कोठा नै रहेन, पढाई अवरुद्ध भयो ।”
कक्षा कोठाकालागि दुई वटा ट्रष्ट लगाएर निर्माण गरिएका भवन र दुई वटा पक्की भवनहरु निर्माण गरेको दुई तीन वर्ष मात्रै भएको उहाँले बताउनुभयो । पहिरोले कक्षा कोठामा क्षति पुगेको स्थानीय उमेश देउवाले बताउनुभयो । गत वर्ष बनेको भवनसँगै निर्माण गरिएका शौचालय तथा विद्यालयका फर्निचरमा समेत क्षति पुगेको छ ।
विद्यालयमा करिब करोड रुपियाँभन्दा बढीको क्षति भएको विद्यालय सञ्चालकहरुको भनाई छ । विद्यालय संचालन गर्ने विषयमा अभिभावक भेला बोलाइएको प्रध्यानाध्यापक कार्कीले बताउनुभयो ।
कार्यपालिकाको बैठक बसेर विद्यालयलाई केही सहयोग गर्न सकिने गन्यापधुरा गाउँ पालिकाका प्रमुख प्रशासकीय अधिकृत दीलिप तामाङले बताउनुभयो ।
