नवराज कट्टेल
विराटनगर, मङ्सिर २३ गते । झण्डै दुईसय वर्षअघि रवीन्द्रनाथ टैगोरले बंगाली भाषामा लेख्नुभएको उपन्यास ‘मालिनी’ ग्रामिण क्षेत्रको रंगमञ्चमा प्रकट भएपछि शहरिया दर्शकको मन गाउँमा तानिएको छ ।
बंगालीबाट अंग्रेजी भाषा हुँदै नेपाली भाषामा अनुवाद गरेर उक्त मालिनी नाटक मोरङको ग्रामथान गाउँपालिका–२ स्थित झोराहाट नाट्य समूहले मञ्चन गरिरहेको छ । दश दिनदेखि लगातार गाउँको नाटक घरमा मालिनी प्रस्तुत भईरहेको छ । २० औं पटकसम्मको प्रदर्शनसम्ममा पनि हल खचाखच भएकाले रंगकर्मीको कलालाई उर्जा थपिएको छ ।
'वास्तवमै मर्मलार्ई छोयो', आदर्श उच्च माध्यमिक विद्यालय विराटनगरका शिक्षक भगिरथ पोखरेलले नाटक हेरेपछि प्रतिक्रिया दिंदै भन्नुभयो – ‘अध्ययनले मात्रै चित्त नबुझिरहेको उपन्यासलाई रंगमञ्चले प्रष्ट्याईदियो ।'
आदर्शका एकसयजना विद्यार्थीसहित विद्यालयका शिक्षकहरुले आइतबार नाटकको १९ औं प्रस्तुति हेर्ने मौका पाउनुभयो । धार्मिक समानता र सहिष्णुता कायम गराउँदै नाटकले राजदरबार र बाहिरका प्रजाबीचको सम्बन्धलाई रंगमञ्चमा पस्केको छ ।
अहिलेसम्मको १५ वटा प्रस्तुतिमा शिक्षक र विद्यार्थीकै कारण नाटक घर भरिभराउ बनेका छन् । पुसको दोस्रो हप्ता काठमाडौंमा पनि प्रदर्शन गर्ने तयारी रहेको आयोजकले जनाएको छ ।
