काठमाडौं, पुष ८ गते । 'ह्यारी पोटर : रिटर्न टु होगवार्ट्स' को ट्रेलर सार्वजनिक भएको छ । ट्रेलर हेरेर फ्यानमा फिल्मसँग सम्बन्धित सबै पुराना याद ताजा भएको छ ।
ट्रेलरमा फिल्मसँग जोडिएका सबै कलाकारले आ–आफ्नो अनुभव साझा गरेको देखिएको छ । सार्वजनिक भएको ट्रेलरमा ह्यारी पोटरको भूमिका निभाउनु भएका ड्यानियल र्याडक्लिफ सुनसान सडकमा हिँडिरहनु भएको देखिन्छ । पछि, उहाँले आफ्ना साथीहरू हर्मियोन ग्रेन्जर (एम्मा वाटसन) र रोन वेस्ली (रुपर्ट ग्रिन्ट) लाई भेट्नुहुन्छ ।
ट्रेलरमा यी तीन बाहेक अन्य कलाकारहरु पनि देखिएका छन् । जनवरी १, २०२२ मा ह्यारी पोटर फ्रेन्चाइजको २० वर्ष पूरा भएको अवसरमा एक विशेष उत्सवको आयोजना गरिएको छ । यस उत्सवको नाम ह्यारी पोटरः रिटर्न टु होगवार्ट्स हो ।
एचबीओ म्याक्समा रिलिज हुने यो शोमा फ्रेन्चाइजीसँग सम्वद्ध सबै कलाकारहरू सहभागी हुनेछन् । सार्वजनिक भएको ट्रेलरमा, सबै कलाकारहरूको ग्रेट हल अफ होगवार्ट्समा पुनर्मिलन भएको देखाइएकाे छ ।
