काठमाडौं, पुस २० गते । कोरोना संक्रमण बढेपछि भारतका विभिन्न राज्यमा सिनेमा हल बन्द भएका छन् । जसको प्रत्यक्ष प्रभाव भारतका फिल्मलाई परेको छ ।
दुई चरणको कोरोना महामारीका कारण समस्या भोगेका निर्माता र प्रदर्शकले राहतको सास फेर्न थाल्नुभएको थियो । तर, ओमिक्रोन भेरियन्टको खतरा बढेपछि भारतमा हलहरु बन्द गर्न थालिएको हो ।
अब फिल्म 'पृथ्वीराज' को पनि निर्माणपक्षले प्रदर्शन मिति पोष्टपोन्ड गरेको जनाइएको छ । यशराज ब्यानरले निर्माण गरेको यो फिल्म ऐतिहासिक कथामा आधारित छ । फिल्मको ट्रेलरलाई दर्शकले रुचाएका छन् ।
चन्द्रप्रकाश द्विवेदीको निर्देशनमा बनेको ऐतिहासिक ड्रामा फिल्म 'पृथ्वीराज' भारतका वीर सपूत पृथ्वीराज चौहानमा आधारित छ । फिल्ममा अक्षय कुमारले पृथ्वीराजको मुख्य भूमिका निर्वाह गर्नुभएको छ ।
फिल्ममा 'मिस वर्ल्ड' मानुषी छिल्लको पनि अभिनय देख्न सकिन्छ । यो उहाँको डेब्यू फिल्म हो । यस बाहेक फिल्ममा सञ्जय दत्त, सोनू सूद र मानव विजको पनि अभिनय छ ।
यसअघि पनि फिल्म 'जर्सी' र 'आरआरआर' को प्रदर्शन मिति स्थगित भइसकेको छ । यस्तै जनवरी २१ मा रिलिज हुने भनिएको अक्षय कुमार र मानुषी छिल्लर अभिनित फिल्मको पनि प्रदर्शन मिति सरेको छ ।
यस्तै, दिल्लीका सबै हल पूर्ण रुपमा बन्द भइसकेका छन् । आन्ध्रप्रदेश र तमिलनाडुमा पनि ५० प्रतिशत अकुपेन्सीमा मात्र हल चलाउन पाइने नियम लागू भएको छ ।
