गोरखापत्र अनलाइन
काठमाडौँ, जेठ १३ गते । जापानको एक मेडिकल समूहले दुई वर्षमुनिका बालबालिकालामा मास्ककाे प्रयोग नगर्न सुझाएका छन् । दुई वर्षमुनिका बालबालिकामा मास्ककाे प्रयोगले श्वास लिन कठीनाइ भई निस्सासिने जोखिम बढी रहेकोले मास्क प्रयोगबाट बच्न अभिभावकलाई जापानी मेडिकल समूहले सुझाव दिएका हुन् ।
कोरोनाभाइरसको सङ्क्रमण रोक्न चिकित्सक र विश्व स्वास्थ्य सङ्गठनले अनिवार्य मास्क प्रयोगमा जोड दिँदैआएको छ । लकडाउन खुकुलो गर्दा सामाजिक दूरी बनाउन कठिन हुँदा मास्क प्रयोग अझै अनिवार्य गरिएको छ । तर जापानको बाल चिकित्सक सङ्घले शिशुका लागि मास्क घातक हुनसक्ने चेतावनी दिएको छ ।
“शिशुमा श्वास लिने नली साँघुरो हुन्छ, मास्क प्रयोगले मुटुमा दबाव बढाउँछ र शिशुमा ‘हिट स्ट्रोक’ समेत बढ्ने जोखिम हुन्छ ।” – जापानी चिकित्सक सङ्घले आफ्नो वेबसाइटमा जारी गरेको सूचनामा उल्लेख गरेको छ ।
अमेरिकी रोग नियन्त्रण केन्द्र(सीडीसी)ले पनि दुई वर्षमुनिका बालबालिकाको अनुहार ढाक्न नहुने सुझाएको छ ।
प्रधानमन्त्री सिन्जो आबेइले टोक्योसहित जापानका चार विभिन्न क्षेत्रमा सोमबार सङ्कटकालीन अवस्था हटाउने घोषणा गर्नुभएको छ । टोक्योसहित चारवटै क्षेत्रमा सङ्क्रमितको सङ्ख्या उल्लेख्य कमी आएपछि प्रधानमन्त्री आबेइले यस्तो घोषणा गर्नुभएको हो ।
