लोकेन्द्र जोशी
दार्चुला, असार ५ गते । एक सातापहिले भारतबाट फकिएका दार्चुलाको मार्मा गाउँपालिकाका पुरुषको मृत्यु भएको छ । भारतको बङ्लोरबाट गौरीफन्टा त्रिनगर नाका हुँदै जेठ २९ गते मार्माको लटिनाथ पुगेका २१ वर्षीय पुरुषको मृत्यु भएको मार्मा गाउँपालिका स्वास्थ्य शाखा संयोजक चक्रसिंह धामीले जानकारी दिनुभयो ।
मार्मा गाउँपालिका वडा नं. ३ घर भएका मृतक पुरुषको मानसिक सन्तुलन गुमेपछि क्वारेन्टाइनबाट आफन्तले घर लगेका थिए । भारतबाट फर्किएर एक दिनमात्रै लटिनाथ माविको क्वारेन्टाइनमा बसेका पुरुषमा बिहीबार ज्वरो बढ्दैगएको र बेलुका मृत्यु भएको पारिवारिक स्रोतले जनाएको छ ।
भारतबाट गाउँपालिका भित्रिएको दिन आरडीटी परीक्षण गर्दा रिपाेर्ट नेगेटिभ आएको थियो । बिहीबार एक्कासी ज्वरो आएर मृत्यु भएपछि पीसीआर विधिबाट कोरोना परीक्षणका लागि स्वाब सङ्कलन गरी धनगढी पठाइएको स्वास्थ्य शाखा संयोजक धामीले बताउनुभयो ।
