नवराज कट्टेल
विराटनगर, साउन १० गते । विराटनगरका तीन जनासहित प्रदेश १ मा शनिबार १० जनालाई कोरोना भाइरस (कोभिड–१९) सङ्क्रमण पुष्टि भएको छ । विराटनगर–६ निवासी ९२ वर्षीया र ४५ महिलासहित विराटनगर घोघापुलका एकजनामा कोरोना सङ्क्रमण पुष्टि भएको हो ।
विराटनगर–६ मा दुई दिनअघि सङ्क्रमित फेला परेकै घरमा शनिबार अन्य दुई जनामा सङ्क्रमण देखिएको महानगरपालिकाका जनस्वास्थ्य निरीक्षक हैदर अलीले जानकारी दिनुभयो ।
घोघापुलका सङ्क्रमित चिकित्सक हुन् । सप्तरी निवासी उनी चार दिनअघि धरानबाट विराटनगरस्थित कोशी अस्पतालका लागि आउनुभएको थियो । अस्पतालमा काम सुरुवात गर्नुअघि गरिएको पीसीआर परीक्षणमा पोजिटिभ आएको जनस्वास्थ्य निरीक्षक अलीले जानकारी दिनुभयो ।
प्रदेश १ मा शनिबार (आज) १० जना कोरोना सङ्क्रमित थपिएका छन् । मोरङमा पाँच, सुनसरीमा दुई, झापा, तेह्रथुम र खोटाङमा एक–एक जनामा सङ्क्रमण देखिएको हो ।
आज मोरङमा पथरीशनिश्चरेका दुई पुरुष, सुनसरीको इनरुवामा दुई पुरुष, झापाको मेचीनगरमा एक महिला, खोटाङको दिक्तेल र तेह्रथुममा एक–एक पुरुषमा कोरोना रिपोर्ट पोजिटिभ आएको सामाजिक विकास मन्त्रालयले जनाएको छ । प्रदेश १ मा कोरोना सङ्क्रमितको सङ्ख्या ८९१ पुगेको छ ।
प्रदेश १ मा शनिबार ४४१ जनाको पीसीआर परीक्षण गरिएको छ । प्रदेश १ मा आजसम्म ३९ हजार ११२ जनाको पीसीआर परीक्षण गरिएको सामाजिक विकास मन्त्रालयका प्रवक्ता डा. सुरेश मेहताले बताउनुभयो ।
