लक्की चौधरी
काठमाडौं, साउन २३ गते । नेपाल कम्युनिष्ट पार्टी (नेकपा) का दुई अध्यक्षबीच साउन १८ देखि तीन दिन निरन्तर भएको वार्तामा पछिल्लो समय ‘ब्रेक’ लागेको छ । गत विहिबार विहान तय भएको दुई अध्यक्षबीचको वार्ता हुन नसकेपछि आज शुक्रबारसम्म पनि तय हुन सकेको छैन । अध्यक्ष तथा प्रधानमन्त्री केपी शर्मा ओलीको स्थायी कमिटी बैठकमै राजीनामा माग हुन थालेपछि स्थायी कमिटी बैठक साउन १३ गतेपछि अहिले अवरुद्ध छ ।
दुई अध्यक्षबीचको वार्ता भने केही समय पछि पुनः तीन दिन निरन्तर चलेको थियो । तर ठोस सहमति हुन सकेन । गत बुधबार अध्यक्ष पुष्पकमल दाहाल ‘प्रचण्ड’ सहित वरिष्ठ नेताहरु माधवकुमार नेपाल, झलनाथ खनाल र प्रवक्ता नारायणकाजी श्रेष्ठले आफू निकट पत्रकारसँग अन्तरक्रिया गर्नुभएकाे र त्यसबाट अध्यक्षबीचको वार्ता र संवाद अहिले अवरुद्ध मानिदैआएको छ । स्थायी कमिटी सदस्य तथा संसदीय दलका उपनेता सुवासचन्द्र नेम्वाङ्ले वार्ताको वातावरण बनाउन दुवै अध्यक्षसँग परामर्श र छलफल गर्नु भए पनि अहिलेसम्म वातावरण बनेको छैन ।
“आन्तरिकरुपमा दुवै पक्षका नेताहरुबीच अनौपचारिक छलफल र संवाद भएपनि दुई अध्यक्षबीचको वार्ताको टुङ्गो लागिसकेको छैन” उपनेता नेम्वाङ्ले गोखापत्र अनलाइनलाई भन्नुभयो । प्रधानमन्त्रीको सञ्चार विज्ञ रामशरण बजगाईले पनि दुई अध्यक्षबीचको बैठक बस्ने टुङ्गो लागिनसकेको जानकारी दिनुभयो । त्यस्तै, अध्यक्ष प्रचण्डका प्रेस सल्लाहकार विष्णु सापकोटाले पनि आन्तरिक नेताहरुसँगको बैठक भएपनि अध्यक्षद्वयबीच वार्ताको टुङ्गो लागिनसकेको बताउनुभयो ।
सम्पादकसँगको बैठक स्थगित
पुष्पकमल दाहाल ‘प्रचण्ड’ सहित वरिष्ठ नेताहरु माधवकुमार नेपाल, झलनाथ खनाल र प्रवक्ता नारायणकाजी श्रेष्ठले शुक्रबार (आज) दिउँसाेका लागि बोलाइएको प्रमुख सञ्चारमाध्यमका सम्पादकहरुसँगको बैठक एकाएक स्थगित भएको छ । काठमाडौंको नागपोखरिस्थित होटल ‘मेरियट’ मा आव्हान भएको बैठक स्थगित भएको खवर आएको सम्पादकहरुले जानकारी गराउनुभयो । अध्यक्ष प्रचण्डको निर्देशनमा बैठक स्थगित गरिएको बुझिएको छ । यसअघि गत बुधबार पत्रकारसँग गरिएको अन्तरक्रियाको तीव्र आलोचना भएको थियो ।
