नवीन शिशिर विक
बागलुङ, भदौ २९ गते । बागलुङको जैमिनी नगरपालिका–१ टुनीबोटमा पहिरोले बस्ती बगाउँदा एक पुरुष बेपत्ता हुनुभएको छ । पाँच घर पूर्ण रुपमा क्षति भएका छन् ।
अविरल वर्षाको कारण सोमबार बिहान साढे ६ बजेको समयमा बस्तीमाथि रहेको सडकबाट झरेको पहिरोले घर भत्किँदा स्थानीय ६८ वर्षीय हरिकृष्ण शर्मा बेपत्ता हुनुभएको हो ।
पहिरोले टुनीबोटका देवी शर्मा, इन्द्र शर्मा, रत्नबहादुर क्षेत्री, तारादेवी क्षेत्री, र बेपत्ता हरिकृष्ण शर्माको घर पूर्ण क्षति भएको जिल्ला प्रहरी कार्यालय बागलुङका प्रहरी निरीक्षक हेम केसीले जानकारी दिनुभयो ।
आईतबार विहान पनि सोही ठाउँमा पहिरोले मणीभद्रपाध्याको घर भत्किँदा स्थानीय ६५ वर्षीय लक्ष्मीदेवी पाध्याको मृत्यु भएको थियो । घटनास्थलमा नेपाल प्रहरी र स्थानीयवासीले बेपत्ताको खोजी कार्य सुरु गरेको जैमिनी नगरपालिकाका बरिष्ठ कार्यक्रम अधिकृत भेषराज शर्माले जानकारी दिनुभयो ।
२०८१ मंसिर १५ शनिवार
