काठमाडौँ, मङ्सिर २६ गते । स्पेनिस ला लिगाको दोस्रो स्थानमा आसिन सेभियाले एथलेटिक बिल्बाओमाथि कठिन जित निकालेको छ । शनिबार राति भएको खेलमा सेभियाले बिल्बाओलाई उसैको मैदानमा १–० गोलले हरायो ।
प्रतिस्पर्धात्मक खेलमा सेभियालाई जिताउन थोमस डिलानीले गोल गर्नुभयो । थोमसले ३८औँ मिनेटमा गोन्जालो मोन्टेलको पासमा गोल गर्नुभएको हो । दोस्रो हाफमा दुवै टोलीले गोल गर्ने राम्रा अवसर गुमाएका थिए ।
जितसँगै सेभियाले १६ खेलबाट ३४ अंक बनाएको छ । शीर्षस्थानमा रहेको रियल म्याड्रिडको ३९ अंक छ । तेस्रो स्थानमा रहेको रियल बेटिसको ३० अंक छ । पराजित बिल्बाओ २१ अंकसहित १०औँ स्थानमा छ ।
शनिबार रातिनै भएको खेलमा भ्यालेन्सियाले इल्चेलाई २–१ गोलले हराएको छ । जितसँगै भ्यालेन्सिया सातौँ स्थानमा उक्लिएको छ । भ्यालेन्सियाको २५ अंक छ । पराजित इल्चे १५ अंक सहित १६औँ स्थानमा छ ।
अर्को खेलमा स्पान्योलले १० खेलाडीमा सिमित लिभान्तेलाई ४–३ गोलले हरायो । जितसँगै २३ अंक बनाएको स्पान्योल नवौँ स्थानमा छ । अठ अंक बनाएको लिभान्ते तालिकाको अन्तिममा छ । अलाभेस र गेटाफेले १–१ गोलको बराबरी खेल्दै अंक बाँडेका छन् । बराबरीसँगै १५ अंक बनाएको अलाभेस १७औँ र १२ अंक बनाएको गेटाफे १८औँ स्थानमा छ । एजेन्सी
